قاراعاندى وبلىسىندا جاڭا اۋقىمدى باستاما – «كىتاپ وقيتىن ۇلت» جوباسى ىسكە قوسىلدى. جوباعا مەكتەپ وقۋشىلارى، ستۋدەنتتەر، پەداگوگتار، وتباسىلىق اۋلەتتەر جانە مەملەكەتتىك قىزمەتشىلەر قاتىسادى. التى اي ىشىندە قاتىسۋشىلار 15 كىتاپ وقۋى ءتيىس. ەڭ ۇزدىكتەرى اقشالاي سىيلىقتارعا، سەرتيفيكاتتارعا جانە مەدالدارعا يە بولادى. بۇل تۋرالى قاراعاندىدا وتكەن ءبىلىم سالاسى قىزمەتكەرلەرىنىڭ تامىز كونفەرەنتسياسىندا حابارلاندى.
– باستى ماقساتىمىز – قازاقستاندىقتاردىڭ كىتاپ وقۋ دەڭگەيىن جىلىنا كەمىندە 10 كىتاپقا جەتكىزۋ. بايقاۋ ارقىلى ءبىز وقۋعا دەگەن قىزىعۋشىلىقتى ارتتىرىپ قانا قويماي، كىتاپتى مەكتەپ كەزىنەن باستاپ تۇراقتى ادەتكە اينالدىرۋدى كوزدەپ وتىرمىز، – دەدى «كىتاپ وقيتىن ۇلت – چيتايۋششايا ناتسيا» قورىنىڭ اتقارۋشى ديرەكتورى ايان ساقوشەۆ.
بايقاۋ قىركۇيەك ايىندا باستالىپ، ونىڭ قورىتىندىسى 2026 جىلدىڭ ناۋرىز ايىنىڭ سوڭىندا شىعارىلادى.
قاراعاندى وبلىسىنىڭ اكىمى ەرماعانبەت بولەكپاەۆ وقىرماندىق مادەنيەتتى دامىتۋ ءوڭىردىڭ باستى باسىمدىقتارىنىڭ ءبىرى ەكەنىن اتاپ ءوتىپ، جوبانى كىدىرىسسىز جۇزەگە اسىرۋ قاجەتتىگىن ايتتى.
– مەملەكەت باسشىسى قاسىم-جومارت توقاەۆ وقۋ مادەنيەتىن قالىپتاستىرۋدى ۇلتتىڭ پروگرەسسيۆتى ويلاۋ جۇيەسىنىڭ نەگىزى دەپ باعالادى. سوندىقتان «كىتاپ وقيتىن ۇلت» جوباسىن تولىق قولداپ، كىتاپحانا قىزمەتىن جەتىلدىرۋ، وقۋشىلاردى، پەداگوگتاردى جانە اتا-انالاردى كىتاپ وقۋعا كەڭىنەن تارتۋ ماڭىزدى، – دەدى ەرماعانبەت بولەكپاەۆ.
