مەملەكەت باسشىسى قاسىم-جومارت توقاەۆ جولداۋىندا ءبىر پالاتالى پارلامەنت قۇرۋ ماسەلەسىن كوتەردى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
توقاەۆ ون جىل بويى سەناتتى باسقارعانىن ەسكە الىپ، بۇل جۇمىستىڭ زور جاۋاپكەرشىلىك ەكەنىن اتاپ ءوتتى. دەگەنمەن، ول بۇگىنگى كۇنى پارلامەنتتىك رەفورما تۋرالى ماسەلەنى اشىق تالقىلاۋ قاجەتتىگىن ايتتى.
«بۇل – وتە ماڭىزدى ماسەلە. ونى اسىعىس جۇزەگە اسىرۋعا بولمايدى. رەفورما ازاماتتىق سەكتوردا، ساراپشىلار اراسىندا جانە قازىرگى پارلامەنتتە جان-جاقتى تالقىلانۋى ءتيىس. تالقىلاۋعا ءبىر جىل ۋاقىت قاجەت دەپ سانايمىن»، – دەدى پرەزيدەنت.
مەملەكەت باسشىسى 2027 جىلى جالپىۇلتتىق رەفەرەندۋم وتكىزىپ، حالىقتىڭ كەلىسىمىمەن كونستيتۋتسياعا وزگەرىستەر ەنگىزۋ مۇمكىندىگىن ۇسىندى.
«ەگەر ءبىر پالاتالى پارلامەنت قۇرۋ قاجەت دەگەن ورتاق شەشىمگە كەلسەك، ونداي پارلامەنتتى تەك قانا پارتيالىق ءتىزىم بويىنشا سايلاعان ءجون دەپ سانايمىن»، – دەدى توقاەۆ.
ونىڭ سوزىنشە، ءماجىلىستىڭ قازىرگى قۇرامى بارلىق زاڭدىق راسىمدەر اياقتالعانشا ءوز جۇمىسىن جالعاستىرا بەرەدى. ال سەنات جالپىۇلتتىق رەفەرەندۋم قورىتىندىسى شىعىپ، جاڭا پارلامەنت سايلاۋى وتكەنگە دەيىن قىزمەتىن الاڭسىز اتقارادى.
