ابايدىڭ «قارا سوزدەرى» ورتاق تۇركى ءالىپبيى نەگىزىندە جارىق كوردى، دەپ حابارلايدى "ادىرنا" ۇلتتىق پورتالى.
سونىمەن قاتار حالىقارالىق تۇركى اكادەمياسى ۇلى اقىن، ويشىل اباي قۇنانبايۇلىنىڭ 180 جىلدىعىنا وراي بىرقاتار ماڭىزدى ەڭبەكتەردىڭ تۇساۋىن كەستى.
الماتىدا وتكەن حالىقارالىق كونفەرەنتسيا بارىسىندا العاش رەت 1954 جىلى باكۋدە كيريلل قارپىمەن باسىلىپ، سودان بەرى قايتا جاريالانباعان مۇحتار اۋەزوۆتىڭ «اباي جولى» رومان-ەپوپەياسىنىڭ العاشقى ەكى كىتابى («اباي») ازەربايجان تىلىنە قازىرگى لاتىن الىپبيىمەن اۋدارىلىپ باسىلدى.
سونداي-اق، قازاق ابايتانۋشىسى قايىم مۇحامەدحانوۆتىڭ «ابايدىڭ مۇراگەرلەرى» ەڭبەگى تۇرىك تىلىنە اۋدارىلىپ وقىرمانعا جول تارتتى.
"اباي مۇراسى تەك قازاق حالقىنىڭ عانا ەمەس، بۇكىل تۇركى وركەنيەتىنە ورتاق قۇندىلىق. اكادەميانىڭ جاڭا باسىلىمدارى ۇلى ويشىلعا دەگەن قۇرمەتپەن قاتار، تۇركى الەمىندەگى مادەني بىرلىك پەن ساباقتاستىقتى نىعايتۋعا باعىتتالعان ماڭىزدى قادام", - دەدى تۇركى اكادەمياسىنىڭ پرەزيدەنتى، اكادەميك شاھين مۇستافاەۆ.
شاراعا قازاقستان ۇلتتىق عىلىم اكادەمياسىنىڭ پرەزيدەنتى اقىلبەك قۇرىشباەۆ بەينەۇندەۋ جولداپ، قۇتتىقتاۋىن ءبىلدىردى.
ايتا كەتسەك، تۇركى الەمىنىڭ ورتاق ءالىپبيى كوميسسياسى 34 ارىپتەن تۇراتىن ۇلگى ۇسىنعان بولاتىن.
سونداي-اق، جۋىردا تۇركى حالىقتارىنىڭ تاريحىنا ارنالعان ەكى تومدىق جيناق جارىق كورمەك. العاشقى تومدا گەوگرافيا، ساياسي جانە ەتنيكالىق تاريح قامتىلسا، ەكىنشى كىتاپ مادەنيەتكە ارنالادى.
