جۋرناليست گۇلبانۋ ابەنوۆا ءماجىلىس دەپۋتاتى ارداق نازاروۆتىڭ بىلىمىنە قاتىستى الەۋمەتتىك جەلىدە جازبا جاريالادى، دەپ حابارلايدى "ادىرنا" ۇلتتىق پورتالى.
ابەنوۆانىڭ دەرەگىنشە، نازاروۆ 2011 جىلى، 31 جاسىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىن «قۇقىقتانۋ» ماماندىعى بويىنشا تامامداعان. سونىمەن بىرگە اشىق دەرەككوزدەردە ونىڭ قازاق كولىك جانە كوممۋنيكاتسيالار ۋنيۆەرسيتەتىن «ەكونوميكا» ماماندىعى بويىنشا بىتىرگەنى كورسەتىلگەنىمەن، ناقتى وقۋ جىلى جازىلماعان.
ال پارلامەنت سايتىنداعى مالىمەتكە سايكەس، 2014 جىلى نازاروۆ قازاق سپورت جانە تۋريزم اكادەمياسىن «دەنە مادەنيەتى جانە سپورت» ماماندىعى بويىنشا اياقتاعان.
ءجۋرناليستتىڭ ايتۋىنشا، كەشە عانا ۋيكيپەدياداعى نازاروۆتىڭ ءومىربايانىندا ونىڭ ءبىلىمى تۋرالى دەرەكتەر بولعانىمەن، بۇگىن ول ابزاتس جويىلىپ كەتكەن. قازىر ونلاين ەنتسيكلوپەدياداعى اقپارات بىردەن سپورتتىق جەتىستىكتەرىنەن باستالادى.
«كەشە عانا نازاروۆ جايلى جازبامدى 17,6 مىڭ ادام كوردى. مەنىڭ ءوتىنىشىم: وسى اتالعان ءۇش ۋنيۆەرسيتەتتىڭ بىرىندە نازاروۆپەن بىرگە وقىعاندار بولسا، پىكىر جازىڭىزدار»، – دەدى ابەنوۆا.
سونىمەن قاتار ول بۇعان دەيىن جوعارى ءبىلىم ءمينيسترى ساياسات نۇربەكتىڭ «كوكشە» اكادەمياسىنداعى ستۋدەنتتىك جىلدارىنا قاتىستى دا ەشكىمنەن پىكىر تۇسپەگەنىن اتاپ وتكەن.
بۇعان دەيىن، ارداق نازاروۆ ءماجىلىستىڭ پلەنارلىق وتىرىسىندا دەپۋتاتتىق ساۋالىن باستاماس بۇرىن اناسىن تۋعان كۇنىمەن قۇتتىقتاپ، كوپشىلىك نازارىنا ىلىككەن ەدى.
