تالدىقورعان قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى سەزىم ەرتاناتوۆ گارۆارد ۋنيۆەرسيتەتىنەن شاقىرتۋ الدى.
جاس جەتكىنشەكتىڭ ءبىلىم الۋداعى جەتىستىكتەرى، قاتارلاستارى اراسىنان دارالايتىن كوشباسشىلىق قاسيەتتەرى، ۇلكەن جۇمىس قابىلەتتىلىگى سەزىمگە ءوز جوسپارىن جۇزەگە اسىرۋعا مۇمكىندىك بەردى. ويتكەنى، اقش-تاعى ەڭ تانىمال ۋنيۆەرسيتەتتەردىڭ بىرىنە ءتۇسۋ - بۇل كەزدەيسوقتىق ەمەس، قاجىرلى ەڭبەك پەن تىنباي ىزدەنۋدىڭ ناتيجەسى.
گارۆارد وقۋ ورنى- جوعارى ءبىلىم بەرۋ ستاندارتتارىمەن تانىمال امەريكاندىق، ەليتالىق ۋنيۆەرسيتەتتەردىڭ ءبىرى.
سەزىم گارۆاردتىڭ كومپيۋتەرلىك عىلىمدار بولىمىندە باكالاۆرياتقا ءتۇسۋدى جوسپارلاپ وتىر. ونىڭ سوزىنشە ەلىمىزدە ساندىق تەحنولوگيانى دامىتۋ ءالى دە كەشەۋىلدەپ جاتىر. جەتكىنشەك ءوز ءبىلىمىن جەتىلدىرۋ ارقىلى وتاندىق IT سالانى ىلگەرىلەتۋدى كوزدەيدى.
- مەنى ارقاشان اقپاراتتىق تەحنولوگيالار تەوريالىق جانە ماتەماتيكالىق تۇرعىدان قالاي جۇمىس جاسايتىنى قىزىقتىرادى. قازىرگى ۋاقىتتا مەن Java, C ++, PHP سياقتى باعدارلامالاۋ ءتىلىن ۇيرەندىم. مەن سونداي-اق ءتۇرلى ۆەب-سايتتاردى جاساعاندى، دەرەكتى فيلمدەر تۇسىرگەندى جانە رەداكتسيالاعاندى ۇناتامىن، - دەيدى گارۆاردتىڭ بولاشاق ستۋدەنتى.
سەزىمگە ءدارىس بەرىپ جۇرگەن ماتەماتيكا ءپانىنىڭ مۇعالىمى زۋحرا نۋرلىحانوۆنانىڭ ايتۋىنشا، جاس جەتكىنشەكتىڭ بولاشاقتا تابىستى مامان بولۋعا بارلىق مۇمكىندىگى بار. ول ءوز بەتىنشە وقۋعا قابىلەتتى، بەلگىلى ءبىر ماسەلەلەر مەن سۇراقتاردى شەشۋدىڭ ءارتۇرلى نۇسقالارىن مەڭگەرگەن. ماقساتتىلىق پەن سانالى باسىمدىلىق - ونىڭ ەڭ مىقتى قاسيەتتەرى.
ونىڭ تاپقىرلىعى تەك ماتەماتيكا ساباعىندا عانا ەمەس، جالپى مەكتەپتىڭ ءوزىن-ءوزى باسقارۋ «كوشباسشىلىق» سالاسىندا دا ايقىن كورىندى. مەكتەپ قابىرعاسىندا سەزىم بىرقاتار ەرىكتىلەر قوزعالىسىن ۇيىمداستىردى، كاسىپتىك باعدارلاۋ كوميتەتىن اشتى جانە بۇۇ مودەلى ويىنى بويىنشا قالالىق كونفەرەنتسيا ۇيىمداستىردى. سونىمەن بىرگە ول ينفورماتيكا جانە قازاق ءتىلى پاندەرىنەن «جاس عالىم»، «دارابوز» اتتى حالىقارالىق، رەسپۋبليكالىق وليمپيادالارىنىڭ جۇلدەگەرى جانە جەڭىمپازى اتاندى.
- سەزىم، مەنىڭ ويىمشا، رەسپۋبليكانىڭ كوپتەگەن مەكتەپ وقۋشىلارى ءۇشىن ءوزىنىڭ تاباندىلىعى مەن ناقتى جوسپارلاۋ قابىلەتىنىڭ ارقاسىندا الەمدەگى ەڭ ۇزدىك ۋنيۆەرسيتەتكە تۇسە العان ادامنىڭ ۇلگىسى بولدى. تالدىقورعان قالاسىنداعى نازارباەۆ زياتكەرلىك مەكتەبىنىڭ تاريحىندا سەزىم - گارۆاردقا شاقىرىلعان ەكىنشى وقۋشىمىز»، - دەيدى ديرەكتوردىڭ وقۋ ءىسى جونىندەگى ورىنباسارى ەرالي بيجانوۆ.
