الماتى وبلىسىنىڭ تالعار اۋدانىندا 2,1 مىڭ اپورت الماسىنىڭ كوشەتى ءوسىرىلدى. بۇل تۋرالى قر اۋىل شارۋاشىلىعى مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
مينيستر ايداربەك ساپاروۆ تالعارداعى قازاق جەمىس-جيدەك جانە ءجۇزىم شارۋاشىلىعى عىلىمي-زەرتتەۋ ينستيتۋتىنىڭ ايماقتىق فيليالىندا بولىپ، «اپورت» الماسىن قايتا جاڭعىرتۋ جوباسىنىڭ ىسكە اسىرىلۋ بارىسىن تالقىلادى.
كەزدەسۋدە 2025–2028 جىلدارعا ارنالعان «اپورت الماسىن قايتا جاڭعىرتۋ جول كارتاسىنىڭ» ورىندالۋ بارىسى قارالىپ، پروبلەمالار مەن ولاردى شەشۋ جولدارى تالقىلاندى.
الىنعان ناتيجەلەر:
- 2024 جىلى جوڭعار الاتاۋى ۇلتتىق پاركىندە 60 مىڭ سيۆەرس جابايى الماسىنىڭ تۇقىمىجينالىپ، 0,7 گەكتار جەرگە پيتومنيك سالىندى.
- 2025 جىلدىڭ اقپانىندا 0,5 گەكتار اۋماقتا قىسقى كوپۋليروۆكا جۇرگىزىلدى.
- قازىرگى تاڭدا 2100 اپورت كوشەتى دايىندالدى.
- بيىلعى كۇزدە 10 گەكتار الما باعى وتىرعىزىلادى.
- 2027 جىلعا قاراي اپورت الماسىنىڭ جالپى القابى 110 گەكتارعا جەتپەك.
اپورت – الماتى ءوڭىرىنىڭ برەندى ءارى قازاقستاننىڭ مادەني مۇراسى سانالادى. حح عاسىردا ونىڭ داڭقى الەمگە جايىلىپ، ەرەكشە ءدامى مەن ىرىلىگىمەن تانىمال بولدى. الايدا سوڭعى ونجىلدىقتاردا اپورت الماسىنىڭ ونىمدىلىگى تومەندەپ، ارنايى مەملەكەتتىك باعدارلاما قابىلداندى.
پرەزيدەنتتىڭ 2024 جىلعى تاپسىرماسىنان كەيىن اپورتتى قالپىنا كەلتىرۋ جۇمىستارى قارقىندى تۇردە قولعا الىندى. بيىلعى جەتىستىكتەر وسى جوبانىڭ ناقتى ناتيجەلەرىن كورسەتىپ وتىر.
