اقتوبەدە 12 ادامنىڭ ءومىرىن جالماعان جول اپاتىنا بايلانىستى رەسپۋبليكا كۇنىنە ارنالعان گالا-كونتسەرت وتپەيتىن بولدى. بۇل تۋرالى قالا اكىمدىگى مالىمدەدى، دەپ حابارلايدى "ادىرنا".
اكىمدىكتىڭ حابارلاۋىنشا، «قازاق حالقىنا مىڭ العىس» الاڭىندا وتەدى دەپ جوسپارلانعان گالا-كونتسەرت پەن وتشاشۋ بولمايدى.
«25 قازان كۇنى ساعات 19:00-دە «قازاق حالقىنا مىڭ العىس» الاڭىندا جوسپارلانعان گالا-كونتسەرت پەن وتشاشۋ وڭىردە قالىپتاسقان جاعدايعا بايلانىستى وتپەيدى»، - دەلىنگەن وبلىس اكىمدىگىنىڭ مالىمدەمەسىندە.
ەسكە سالا كەتەيىك، كەشە تاڭعى ساعات 08:40 شاماسىندا اقتوبە وبلىسىندا بەلقوپا اۋىلىنىڭ ماڭىندا جانتۇرشىگەرلىك جول اپاتى بولىپ، 12 ادام كوز جۇمدى.
قازا بولعانداردىڭ ىشىندە ەكى كامەلەتكە تولماعان بالا بارى انىقتالدى. ولاردىڭ بىرەۋى 2022 جىلى، بىرەۋى 2016 جىلى تۋعان. سونداي-اق، ءبىر ءۇيدىڭ ادامدارى دا بار.
اپاتتان كەيىن قازاۆتوجول رەسپۋبليكالىق ماڭىزى بار جولدا كولىك قوزعالىسىنا شۇعىل شەكتەۋ قويدى.
