كورەرمەننىڭ ىستىق ىقىلاسىنا بولەنگەن «QAITADAN» ءفيلمى قازاقستانداعى كرەاتيۆتى يندۋستريا سالاسىنداعى بەدەلدى ماراپاتتاردىڭ ءبىرى – «STEPPE AWARDS» سىيلىعىنىڭ يەگەرى اتاندى. كارتينا «كينەماتوگراف» نوميناتسياسىندا جەڭىسكە جەتتى.
«QAITADAN» – رەجيسسەر دۋمان ەركىمبەكتىڭ تولىقمەتراجدى دەبيۋتتىك تۋىندىسى. فيلم قر مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن ءتۇسىرىلدى. جوبا 2023 جىلعى كينو جوبالار پيتچينگىندە جەڭىمپاز اتانىپ، مەملەكەت قولداۋىمەن تۇسىرىلگەن جانە پروكاتتا 1 ميلليارد تەڭگەدەن استام قاراجات جيناعان العاشقى وتاندىق فيلم رەتىندە تاريحقا ەندى.
فيلمدە قالادا وسكەن راۋان ەسىمدى جىگىت اۋىلدا جۇمباق ۋاقىت ىلمەگىنە ءتۇسىپ قالادى. ماسەلەنى شەشۋگە تىرىسقان ول ۇلكەن اپاتتىڭ كۋاگەرى بولادى. كارتينا ۇرپاق ساباقتاستىعى، جاۋاپكەرشىلىك، قاۋىپسىزدىك جانە كومەك قولىن سوزۋ سەكىلدى تاقىرىپتاردى قوزعايدى.
باستى رولدەردى جاسۇلان كوپبەرگەن، شۇعىلا ەشەنوۆا، ايبەك ازىمبەك جانە ەرمەك شىنبولاتوۆ سومداعان. ءتۇسىرىلىم جۇمىستارى الماتى وبلىسىندا ءوتتى. فيلمدە كومپيۋتەرلىك گرافيكامەن قاتار شىنايى ارنايى ەففەكتىلەر قولدانىلعان. قويۋشى-سۋرەتشى – بەكەن نارباي، پروديۋسەرلەر – جالىن تىلەۋبەرگەنوۆ پەن تالعات سىرمانوۆ.
