اقتوبە وبلىسىندا بۇگىنگە دەيىن اۋىل شارۋاشىلىعى سالاسىندا 296,8 ملرد. تەڭگەنىڭ ءونىمى ءوندىرىلىپ، ناقتى كولەم يندەكسى 103,1% قۇرادى. بۇل تۋرالى اۋىل شارۋاشىلىعى باسقارماسى ماماندارى مالىمدەدى.
اقتوبە وبلىسى اۋىل شارۋاشىلىعى سالاسى قارقىندى دامىعان ايماقتاردىڭ ءبىرى بوپ سانالادى. وڭىردە جىل وتكەن سايىن ءتورت تۇلىك سانى ارتىپ كەلەدى. ياعني اتا كاسىپتى جانداندىرىپ، ناپاقاسىن تاۋىپ وتىرعان جاندار از ەمەس. اتالمىش سالاعا اعىمداعى جىلى جەرگىلىكتى بيۋدجەتتەن 14,5 ملرد. تەڭگە قاراجات ءبولىنىپ، سايكەسىنشە مال باسى ءوسىپ وتىر. ايماقتا ءمۇيىزدى ءىرى قارا – 596,1 مىڭ، قوي مەن ەشكى – 1 228,8 مىڭ، جىلقى – 368,2 مىڭ، تۇيە – 25,7 مىڭ، قۇس – 1 281,8 مىڭ باستى قۇرايدى. ەت ءوندىرىسى – 77,9 مىڭ، ءسۇت ءوندىرىسى – 142,4 مىڭ توننادان اسىپ، وتكەن جىلمەن سالىستىرعاندا 102,5%-عا ءوسىم بايقالادى.
اقتوبەدە بيىل اۋىل شارۋاشىلىعى داقىلدارىنىڭ القابى 755,6 مىڭ گا قۇراۋدا، ونىڭ ىشىندە 575,3 جازعى داقىلدار، 15,3 مىڭ گا كۇزدىك داقىل، جانە كوپ جىلدىق شوپتەر. اۋىل شارۋاشىلىعى داقىلدارىنىڭ جازدىق ەگىس جۇمىستارى 575,3 مىڭ گا القاپتا جۇرگىزىلىپ، ەگىس جۇمىستارى اگروتەحنيكالىق مەرزىمىندە اياقتالدى. باسقارما مالىمەتىنشە، ەگىس القاپتارىن ءارتاراپتاندىرۋ ماقساتىندا وتكەن جىلمەن سالىستىرعاندا مايلى داقىلدار القابى 13,2 مىڭ گەكتارعا جانە مال ازىعى داقىلدارى 42,8 مىڭ گەكتارعا ۇلعايعان.
تەحنيكالار سايلانعان، شارۋالار جاعدايى جايلانعان
وڭىردە بيىل ەگىس ناۋقانى باستالماس بۇرىن ەگىس ناۋقانىنا قاجەتتى تۇقىم كولەمى، ديزەل وتىنى، سونداي-اق اۋىل شارۋاشىلىعى تەحنيكالارىنىڭ دايىندىعى تولىعىمەن قامتاماسىز ەتىلگەن. اعىمداعى جىلى وبلىس بويىنشا ءداندى داقىلداردىڭ ەگىن جيناۋ القابى 426,4 مىڭ گا، مايلى داقىلدار 60,3 مىڭ گا، كارتوپ جانە كوكونىس-باقشا داقىلدارى 6,1 مىڭ گا قۇرايدى.
ەگىن جيناۋ جۇمىستارىن جۇرگىزۋگە 600 جۋىق استىق ورۋ كومباينى، 1,5 مىڭ تراكتور، 800 تراكتور تىركەمەسى مەن 500 جۇك اۆتوموبيلدەرى جۇمىلدىرىلعان.
كۇزگى دالالىق جۇمىستارىنا قاجەتتىلىكتى تولىق كولەمدە قامتاماسىز ەتۋ ءۇشىن 7,2 مىڭ توننا ارزانداتىلعان ديزەل وتىنى ءبولىنىپ، شارۋالارعا نارىقتان الدەقايدا تومەن باعاعا ديزەل وتىنى 1 ليترىنە 250 تەڭگەگە بەرىلگەن.
ەگىن جيناۋ ناۋقانى تابىستى اياقتالدى
اقتوبە وڭىرىندە بيىلعى اۋىل شارۋاشىلىعى جۇمىستارى ءوز دەڭگەيىندە ۇيىمداستىرىلىپ، ەگىن جيناۋ ناۋقانى ءساتتى تامامدالعان. وبلىس شارۋالارى اۋا رايىنىڭ قۇبىلمالى جاعدايلارىنا قاراماستان، بارلىق اۋىل شارۋاشىلىعى داقىلدارىن وڭتايلى اگروتەحنيكالىق مەرزىمدە جيناپ ۇلگەرگەن. وبلىستىق اۋىل شارۋاشىلىعى باسقارماسىنىڭ مالىمەتىنشە، بيىل 426,4 مىڭ گەكتار ءداندى داقىلدار القابىنان ءونىم ورىلعان. ورتاشا ونىمدىلىك گەكتارىنا 13 تسەنتنەردى قۇراپ، بارلىعى 554 مىڭ توننا استىق باستىرىلعان.
سونىمەن قاتار، كارتوپ، مايلى جانە كوكونىس داقىلدارىن جيناۋ دا تولىعىمەن اياقتالعان. اتاپ ايتقاندا، 3,2 مىڭ گەكتار جەردەن كارتوپ جينالىپ، ورتاشا ونىمدىلىك 204 تسەنتنەردەن، جالپى ءتۇسىم 65 مىڭ توننا، مايلى داقىلدار – 60,3 مىڭ گەكتاردان، گەكتارىنا 12 تسەنتنەر ءونىم بەرىپ، جالپى كولەمى 70 مىڭ توننا، 2,1 مىڭ گەكتار القاپتان كوكونىس داقىلدارى – 178 تسەنتنەر ءونىم تۇسىممەن 37 مىڭ توننا كوكونىس الىنعان.
ەگىننىڭ ساپالى ساقتالۋىن قامتاماسىز ەتۋ ماقساتىندا وڭىردە استىق ساقتاۋ ورىندارىنىڭ جالپى سىيىمدىلىعى 685,1 مىڭ توننا ءونىمدى قۇرايدى. ونىڭ ىشىندە 381,0 مىڭ تونناسى – استىق قابىلداۋ كاسىپورىندارىندا، ال 304,1 مىڭ تونناسى – شارۋاشىلىقتاردىڭ ءوز قويمالارىندا ساقتالادى. بۇل كولەم وڭىردە جينالعان استىق ءونىمىن تولىق ساقتاۋعا مۇمكىندىك بەرەدى. قازىرگى تاڭدا وبلىستا 15 استىق كەپتىرگىش قوندىرعى جۇمىس ىستەيدى. ونىڭ 8-ءى استىق قابىلداۋ كاسىپورىندارىندا، 7-ءى اۋىل شارۋاشىلىعى قۇرىلىمدارىندا ورناتىلعان. اۋىل شارۋاشىلىعى سالاسىنىڭ ماماندارىنىڭ ايتۋىنشا، بيىلعى ناۋقان جوعارى ۇيىمداستىرۋ دەڭگەيىندە ءوتتى. ەگىن جيناۋ تەحنيكاسى تولىق دايىندالىپ، جۇمىسقا ۋاقىتىلى كىرىسكەن شارۋالار مول ءونىم الۋعا قول جەتكىزدى.
مەملەكەتتىك باعدارلامالار شاراپاتى
اقتوبە وڭىرىندە اۋىل شارۋاشىلىعى سالاسى قارجىلىق قولداۋ مەن تەحنيكالىق جاڭارتۋلار ارقاسىندا تۇراقتى دامىپ كەلەدى. «كەڭ دالا – 2» باعدارلاماسى اياسىندا كوكتەمگى ەگىس جۇمىستارىنا 5,9 ملرد تەڭگە نەسيە ءبولىندى، ونىڭ ىشىندە 1,1 ملرد تەڭگە «اقتوبە» الەۋمەتتىك-كاسىپكەرلىك كورپوراتسياسى ارقىلى بەرىلگەن.
قاڭتار-قازان ايلارىندا اۋىل شارۋاشىلىعىنا تارتىلعان ينۆەستيتسيا كولەمى 60,6 ملرد تەڭگە بولدى، بۇل جوسپاردان 107,8% جوعارى. ماشينا-تراكتور پاركىن جاڭارتۋ جۇمىستارى جالعاسۋدا: بيىل 1120 بىرلىك تەحنيكا ساتىپ الىنىپ، جاڭارتۋ كورسەتكىشى 5,5% جەتتى.
وبلىس تۇرعىندارى 32 نەگىزگى ازىق-تۇلىك تاۋارلارىنىڭ 24-ءىن ءوز ونىمدەرىمەن قامتاماسىز ەتە الادى. ال قالعان ونىمدەر باسقا وڭىرلەر مەن يمپورت ارقىلى تولىقتىرىلادى.
قازىرگى تاڭدا وبلىستا 100-دەن استام اۋىل شارۋاشىلىعى ونىمدەرىن قايتا وڭدەيتىن كاسىپورىندار جۇمىس ىستەيدى: ديىرمەندەر، ناۋبايحانالار، ماكارون تسەحتارى، ءسۇت وڭدەۋ زاۋىتتارى، شۇجىق جانە تۇشپارا تسەحتارى، وسىمدىك مايىن وندىرەتىن زاۋىتتار. وسىنداي جۇمىستار ءوڭىردىڭ ازىق-تۇلىك قاۋىپسىزدىگىن قامتاماسىز ەتىپ قانا قويماي، اۋىل شارۋاشىلىعى سالاسىنىڭ الەۋەتىن ارتتىرىپ وتىر.
