قازاقستاندا بالمۇزداق ءوندىرىسى قارقىندى دامىپ كەلەدى. تەك 2026 جىلدىڭ العاشقى بەس ايىندا ەلىمىزدە 35,1 مىڭ توننا بالمۇزداق وندىرىلگەن. كوش باسىندا الماتى وبلىسى – 23,3 مىڭ توننا، تۇركىستان وبلىسى – 6,0 مىڭ توننا جانە الماتى قالاسى – 1,3 مىڭ توننا.
قازاقستاندىقتار وسى جازدا سۇيىكتى بالمۇزداعىن تاڭداپ جۇرگەندە، تۇركىستان وبلىسىنداعى «بالمۇزداق» جشس-ءنىڭ زاۋىتىندا (Lengerskoe برەندى) 2027 جىلعا ارنالعان جاڭا دامدەر جەلىسىن ازىرلەۋ جۇمىستارى قىزۋ ءجۇرىپ جاتىر. نەلىكتەن جاڭا ءونىمدى وسىنشاما ەرتە جوسپارلاۋ قاجەت جانە گەرمانيادان كەلگەن ساراپشىلار نە ءۇشىن لەڭگىر ماڭىنداعى اۋىلعا تۇراقتى تۇردە ات باسىن بۇرادى؟ بۇل تۋرالى ءبىزدىڭ ماتەريالىمىزدا.
جاڭا ءدام جاساۋ – ينگرەديەنتتەردى جاي عانا ارالاستىرۋ ەمەس، ءبىر جىلدان استام ۋاقىتتى قاجەت ەتەتىن كۇردەلى تەحنولوگيالىق ۇدەرىس. ءونىمنىڭ ءدامى مەن ساپاسىن ءمىنسىز ەتۋ ءۇشىن برەند تەحنولوگتارى ەۋروپادا تاعىلىمدامادان ءوتىپ، حالىقارالىق مامانداردى تارتادى جانە زەرتحانادا ونداعان سىناق جۇرگىزەدى.
جۋىردا كاسىپورىنعا گەرمانيادان كومپانيانىڭ تەحنولوگيالىق سەرىكتەستەرى كەلدى. كەزدەسۋدىڭ نەگىزگى تاقىرىبى – جاڭا رەتسەپتۋرالاردى ازىرلەۋ جانە سوڭعى جىلدارداعى باستى باعىتتاردىڭ ءبىرى – جەرگىلىكتى شيكىزاتتى بارىنشا كەڭىنەن پايدالانۋ.
زاۋىتتا قازىردىڭ وزىندە شوكولاد ماسساسى مەن تابيعي جيدەك توساپتارىن وندىرەتىن جەكە جەلىلەر جۇمىس ىستەيدى. الايدا باستى باسىمدىق جەرگىلىكتى فەرمەرلەردەن بالعىن ءسۇت ساتىپ الۋعا بەرىلگەن. بۇل ءونىمنىڭ تابيعي قۇرامىن ساقتاۋعا ءارى وڭىردەگى اۋىل شارۋاشىلىعىن قولداۋعا مۇمكىندىك بەرەدى.
ء«بىز “بالمۇزداقپەن” 14 جىلدان بەرى ىنتىماقتاسىپ كەلەمىز جانە وسى ۋاقىت ىشىندە كاسىپورىننىڭ قالاي وسكەنىن كوردىك. گەرمانيادا وتباسىلىق بيزنەس الداعى ونداعان جىلدى، بالالاردىڭ جانە ءوڭىردىڭ بولاشاعىن ويلاپ قۇرىلادى. “بالمۇزداق” تا ءدال وسىنداي قاعيداتپەن جۇمىس ىستەيدى. كومپانيانىڭ جەرگىلىكتى شيكىزاتتى وڭدەۋگە ينۆەستيتسيا سالىپ، تۇرعىنداردان ءسۇت ساتىپ الۋى، فەرمەرلىكتى دامىتۋى جانە ونىمگە قاجەتتى قوسپالاردى ءوزى ءوندىرۋى وتە ماڭىزدى. بۇل قولجەتىمدى باعامەن ءمىنسىز ءونىم شىعارۋدىڭ كەپىلى»، – دەيدى Mirantii GmbH كومپانياسىنىڭ باسقارۋشى ديرەكتورى پيتەر پەتەرسسون.
كاسىپورىننىڭ الداعى جوسپارىندا بالمۇزداق تۇرلەرىن عانا ەمەس، شوكولاد كامپيتتەرىنىڭ اسسورتيمەنتىن دە كەڭەيتۋ بار.
«ساتىپ الۋشىنى ءبىر-ەكى جىلدان كەيىن تاڭعالدىرۋ ءۇشىن جۇمىستى بۇگىننەن باستاۋ كەرەك. نەمىس ارىپتەستەرىمىزدىڭ حالىقارالىق تاجىريبەسى مەن جەرگىلىكتى شيكىزاتقا باسىمدىق بەرۋ – Lengerskoe برەندىنىڭ نەگىزى. ءبىز ءۇشىن ءدامدى دەسەرت شىعارۋ عانا ەمەس، شارۋالارىمىزدى قولداۋ، جاڭا جۇمىس ورىندارىن اشۋ جانە تۋعان ولكەمىزدى دامىتۋ دا ماڭىزدى. بيزنەستىڭ شىنايى تۇراقتىلىعى – ءوز ەلىڭمەن بىرگە ءوسىپ، بىرگە دامۋ»، – دەيدى «بالمۇزداق» جشس-ءنىڭ قۇرىلتايشىسى ديلافرۋز ماديەۆا.
بۇكىل وتباسىعا ۇنايتىن ءدام ازىرلەۋدىڭ ءوزى – بولەك ونەر. ويتكەنى ءار بۋىننىڭ تالعامى ءارتۇرلى. ەرەسەكتەر اراسىندا كلاسسيكالىق «نوستالگيا» ءپلومبيرى ءالى دە باستى فاۆوريت. ال بالالار مەن جاستار جاڭا اسەر مەن ەرەكشە ءدام ۇيلەسىمدەرىن ىزدەيدى. ولاردىڭ اراسىندا ەكزوتيكالىق جەمىستەر، تابيعي قۇلپىناي جانە شيە توساپتارى قوسىلعان بالمۇزداقتار سۇرانىسقا يە.
ال 2027 جىلدىڭ قۇپيا ءدامى قانداي بولماق؟ ونىڭ ناقتى رەتسەپتۋراسىن تەحنولوگتار ازىرگە قاتاڭ قۇپيا ۇستاپ وتىر. ازىرلەۋشىلەردىڭ يشارا ەتكەنى بىرەۋ عانا: جاڭا ءونىم ءدامدى ءارى حوش ءيىستى بولماق.
