ۋكراينادا ەرىكتى قازاق جاۋىنگەرى قازا تاپتى

ۋكراينادا "شەتەلدىك لەگيون" قۇرامىندا شايقاسقان ەتنيكالىق قازاق مارلەن مولدىرايىم قازا بولدى. بۇل تۋرالى حاركوۆ وبلىسىنداعى قازاق دياسپوراسىنىڭ جەتەكشىسى ماككا كاراجانوۆا جاريالادى، دەپ حابارلايدى "ادىرنا".

كاراجانوۆانىڭ ايتۋىنشا، مارلەنمەن سوڭعى اپتالاردا بايلانىس بولماعان. تۋىستارى مەن تانىستارى ونى تابا الماي جۇرگەن. لەگيوننىڭ ىشكى ەرەجەلەرىنە بايلانىستى اسكەري قۇرىلىم وعان قاتىستى اقپاراتتى تاراتا الماعان.

مارلەن مولدىرايىم 2025 جىلدىڭ 13 قاراشاسىندا، سوعىستا جۇرگەن كەزدە قازا تاپتى. ول ۋكرايناعا ءوز ەركىمەن، جەكە ۇستانىمى مەن ادىلدىككە دەگەن سەنىمىنىڭ جەتەلەۋىمەن كەلگەن. قازاقستان ازاماتتىعىنان ەرتەرەك شىققانىمەن، باسقا ەلدىڭ ازاماتى بولسا دا، كۇرەسكە دەگەن شەشىمى وزگەرمەگەن.

مارلەندى تانىعانداردىڭ ايتۋىنشا، ول بىرنەشە ءتىلدى مەڭگەرگەن، كاسىپكەرلىكپەن اينالىسقان، زاڭگەرلىك ءبىلىمى بار، ينتەللەكتۋال تۇلعا بولعان. جاقىندارى مەن ارىپتەستەرى ونى پاراساتتى، ادال جانە جاۋاپكەرشىلىگى جوعارى ادام رەتىندە سيپاتتايدى.

شەتەلدىك لەگيون جاۋىنگەرلەرى مارلەندى «ۋكراينادا ەرىكتى بولىپ قىزمەت ەتكەن ءبىزدىڭ قازاقستاندىق باۋىرىمىز» دەپ قۇرمەتپەن ەسكە الدى.