ۇجىمدىق قاۋىپسىزدىك تۋرالى شارت ۇيىمى باس حاتشىنى اۋىستىرۋعا دايىندالىپ جاتىر، دەپ حابارلايدى «ادىرنا» ءتىلشىسى.
يمانعالي تاسماعامبەتوۆتىڭ وكىلەتتىك مەرزىمى اياقتالۋعا جاقىن، سوندىقتان مۇشە مەملەكەتتەر جاقىن كۇندەرى ونىڭ ورنىنا كەلەتىن جاڭا باس حاتشىنى ءۇش جىلدىق مەرزىمگە تاڭدايدى.
جاڭا كانديداتۋرا 27 قاراشادا بىشكەكتە قارالماق. بۇل كۇنى سىرتقى ىستەر مينيسترلەرى، قورعانىس مينيسترلەرى جانە قاۋىپسىزدىك كەڭەستەرى حاتشىلارىنىڭ بىرلەسكەن وتىرىسى وتەدى.
«كەزدەسۋدە قاتىسۋشىلار ەسىرتكى اينالىمىنا قارسى كۇرەس جانە زاڭسىز كوشى-قون ماسەلەلەرى بويىنشا ىنتىماقتاستىقتى تالقىلايدى. ۇقشۇ ۇجىمدىق قاۋىپسىزدىك كەڭەسىنىڭ سەسسياسىندا ۇيىمعا مۇشە ەلدەردىڭ ورتاق قاۋىپسىزدىك ۇستانىمدارى كورسەتىلگەن دەكلاراتسيا قابىلدانىپ، 2026 جىلى رەسەي ۇيىمعا توراعالىق ەتكەن كەزەڭدە جۇزەگە اسىراتىن باسىم باعىتتار جاريالانادى»، - دەلىنگەن ۇيىم حابارلاماسىندا.
ايتا كەتەيىك، بۇعان دەيىن يمانعالي تاسماعامبەتوۆ پرەمەر-مينيستر، استانا مەن الماتى قالالارىنىڭ اكىمى، قورعانىس ءمينيسترى جانە قازاقستاننىڭ رەسەيدەگى ەلشىسى قىزمەتتەرىن اتقارعان.
جاقىندا تاسماعامبەتوۆتىڭ اتى ۋكراينالىق «ميروتۆورەتس» بازاسىنا ەنگىزىلدى. وندا ونى «سوعىس ناسيحاتى مەن رەسەيدىڭ ۋكرايناعا قارسى اگرەسسياسىن قولدادى» دەپ ايىپتاعان.
