شىعىس قازاقستان وبلىسىنىڭ ەڭ قيىرىنداعى اۋىلداردىڭ ءبىرى – شاناعاتى ءۇشىن بيىل ەرەكشە جاڭالىققا تولى جىل بولدى. بىرنەشە اي بۇرىن ءوڭىردىڭ بۇرىنعى اكىمى ەرمەك كوشەربەۆ قازاقستانداعى ەڭ سۋىق نۇكتەلەردىڭ بىرىنە ارنايى بارىپ، اۋىل جۇرتىمەن كەزدەسىپ، ولاردىڭ سۇرانىس-تىلەكتەرىن تىڭداعان ەدى. سول كەزدەگى ماسەلەلەر نازاردان تىس قالماي، قازىرگى وبلىس اكىمى نۇرىمبەت ساقتاعانوۆ قولداۋىمەن اۋىلعا كوپتەن كۇتكەن ينتەرنەت تارتىلادى.
مارقاكول اۋدانىنداعى ەڭ شالعاي ەلدى مەكەندەردىڭ ءبىرى سانالاتىن شاناعاتىدا وسى كەزگە دەيىن مەكتەپتىڭ ىشكى Wi-Fi-ىن ەسەپتەمەگەندە، تۇراقتى ينتەرنەت جەلىسى بولماعان. قازىر بۇل اۋىلدا 17 وتباسى تۇرادى. سولاردىڭ 13-ءى «Starlink» جۇيەسىنە قوسىلدى، ال قالعان ۇيلەرگە تەگىن free Wi-Fi ورناتىلدى.
اۋىل تۇرعىندارى الەۋمەتتىك جەلىدە جاريالانعان بەينەجازباسىندا قۋانىشتارىمەن ءبولىستى:
– شالعايداعى اۋىلىمىزدا ينتەرنەتكە قول جەتكىزىپ وتىرمىز. بۇرىن قاجەتتى شارۋانى تىندىرۋ ءۇشىن مەكتەپكە نەمەسە كورشى اۋىلعا بارۋعا تۋرا كەلەتىن. ەندى ءبارىن ءوز ۇيىمىزدەن-اق شەشە الامىز. بارشا تۇرعىندار اتىنان بۇل ءىستى جۇزەگە اسىرعان وبلىس اكىمى جانە جەرگىلىكتى اكىمدىككە العىس ايتامىز، – دەيدى ولار.
ينتەرنەتتىڭ كەلۋى – تەك بايلانىس ورناتۋ عانا ەمەس، اۋىلدىڭ الەۋمەتتىك-ەكونوميكالىق دامۋىنا جاسالعان ماڭىزدى قادام. بۇل شالعاي ءوڭىردىڭ تۇرعىندارى ءۇشىن جاڭا مۇمكىندىكتەر اشىلىپ وتىر: قاشىقتان ءبىلىم الۋ، ونلاين جۇمىسقا ورنالاسۋ، مەديتسينالىق كەڭەس الۋ، مەملەكەتتىك قىزمەتتەردى ۇيدەن شىقپاي پايدالانۋ، تسيفرلاندىرۋ يگىلىگىنە تولىق قول جەتكىزۋ.
عالامتوردىڭ كەلۋى – جىراقتا جاتقان شاناعاتى ءۇشىن زور سەرپىلىس. تۇرعىندار ءۇشىن بۇل كۇندەلىكتى ءومىر ساپاسىنىڭ ايتارلىقتاي جاقسارۋى، ال اۋىلدىڭ ءوزى ءۇشىن جاڭا دامۋدىڭ باستاماسى بولماق.
شالعاي اۋىلعا جاڭا يگىلىكتىڭ جەتۋى – تەك تەحنولوگيالىق جاڭارۋ عانا ەمەس، ەڭ باستىسى، وڭىرگە دەگەن قامقورلىقتىڭ ايقىن كورىنىسى.
