تۇركىمەنستان پرەزيدەنتى سەردار بەردىمۇحامەدوۆ 6 جەلتوقساندا ەلدىڭ تۇراقتى بەيتاراپتىعىنىڭ 30 جىلدىعىنا ارنالعان ۇكىمەت وتىرىسىندا ءوزىنىڭ جاڭا كىتابىنىڭ جارىق كورگەنىن جاريالادى. مەملەكەت باسشىسى بۇل ەڭبەكتى حالقىنا ارناعانىن ايتتى، دەپ حابارلايدى “ادىرنا”.
جاڭا كىتاپ «Türkmenistanyň Bitaraplygy – parahatçylygyň we ynanyşmagyň aýdyň ýoly» («تۇركىمەنستاننىڭ بەيتاراپتىعى – بەيبىتشىلىك پەن سەنىمنىڭ جارقىن جولى») دەپ اتالادى. پرەزيدەنتتىڭ ايتۋىنشا، وندا ەلدىڭ بەيتاراپتىق ساياساتىنىڭ ماڭىزى، حالىقارالىق تۇراقتىلىق پەن سەنىمگە ۇلەس قوسۋ ماقساتىنداعى تاريحي باستامالار، سونداي-اق سوڭعى جىلدارداعى ۇلتتىق دامۋ جەتىستىكتەرى قامتىلعان.
بۇل ەڭبەك – سەردار بەردىمۇحامەدوۆتىڭ اۆتورلىعىمەن شىققان ءتورتىنشى كىتاپ.
پرەزيدەنتتىڭ بۇعان دەيىنگى ەڭبەكتەرى:
- 2023 جىلعى جەلتوقسان – العاشقى كىتابى «Ýaşlar – Watanyň daýanjy» («جاستار – ەل تىرەگى») جارىق كوردى. وندا تۇرىكمەن جاستارىنىڭ جەتىستىكتەرى باياندالعان.
- 2024 جىلعى ناۋرىز – «Änew – müňýyllyklardan gözbaş alýan medeniýet» («اناۋ – مىڭجىلدىقتار تەرەڭىنەن باستاۋ الاتىن مادەنيەت») كىتابى شىقتى. شىعارما تۇركى الەمىنىڭ مادەني استاناسى اتانعان اناۋ قالاسىنا ارنالعان.
- 2024 جىلعى جەلتوقساننىڭ سوڭى — «Magtymguly – dünýäniň akyldary» («ماحتۇمقۇلى — الەمنىڭ دانىشپانى») كىتابى جاريالاندى. ول تۇركىمەن كلاسسيگى ماحتۇمقۇلى فراگي مۇراسىنا ارنالعان.
تۇركىمەنستاندا پرەزيدەنتتەردىڭ كىتاپ جازۋى – بۇرىننان قالىپتاسقان ءداستۇر.
العاشقى پرەزيدەنت ساپارمۇرات نيازوۆ («تۇرىكمەنباشى») «رۋحناما» اتتى ەكى تومدىق ەڭبەگىن جازىپ، ونى «حالىقتىڭ رۋحاني كونستيتۋتسياسى» دەپ تانىستىرعان. سونىمەن قاتار پاتريوتتىق جانە ليريكالىق تاقىرىپتاردا بىرنەشە پوەتيكالىق جيناق شىعارعان.
ەكىنشى پرەزيدەنت قۇربانقۇلى بەردىمۇحامەدوۆ 2007–2024 جىلدار ارالىعىندا 60-دان استام كىتاپ جازعان. ونىڭ ەڭبەكتەرى مەديتسينا، دارىلىك وسىمدىكتەر، اقالتەكە جىلقىلارى، الابايلار، ساياسات، ەنەرگەتيكا، مادەنيەت جانە تاۋەلسىزدىك تاقىرىپتارىن قامتىدى.
