ۋكراينا پرەزيدەنتى ۆلاديمير زەلەنسكي ۋكراينانىڭ قارۋلى كۇشتەرى كۇرەس جۇرگىزىپ جاتقان ەڭ قيىن ايماقتاردىڭ ءبىرى — كۋپيانسك باعىتىنا باردى. ول ساپارى تۋرالى حاركوۆ وبلىسىنداعى كۋپيانسك قالاسىنا كىرەبەرىستە تۇسىرىلگەن ۆيدەونى Telegram-ارناسىندا جاريالادى، دەپ حابارلايدى “ادىرنا”.
زەلەنسكيدىڭ ايتۋىنشا، ۋكراينالىق اسكەري بولىمدەر بۇل باعىتتا ماڭىزدى ناتيجەلەرگە قول جەتكىزۋدە.
«بۇگىن — كۋپيانسك باعىتى. مۇندا ۋكراينا ءۇشىن ناتيجەگە جەتىپ جاتقان ءبىزدىڭ جاۋىنگەرلەرىمىز بار. رەسەي تاراپىنان بۇل قالا تۋرالى كوپ مالىمدەمە ايتىلدى. ءبىز شىنايى جاعدايدى ءوز كوزىمىزبەن كورىپ وتىرمىز. اسكەريلەرمەن كەزدەسىپ، قولداۋ ءبىلدىردىم»، — دەدى پرەزيدەنت.
20 قاراشادا رەسەي قورعانىس مينيسترلىگى باس شتابىنىڭ باستىعى ۆالەري گەراسيموۆ ۆلاديمير پۋتينگە رەسەيلىك اسكەردىڭ كۋپيانسكىنى باقىلاۋعا العانىن بايانداعان. ال 2 جەلتوقساندا رەسەي پرەزيدەنتى قالادا ۋكرايندىق توپ قورشاۋدا قالعانىن جانە رەسەيلىك اسكەرلەر «ونى جويۋعا كىرىسكەنىن» مالىمدەدى. پۋتين شەتەلدىك جۋرناليستەرگە جاعدايدى كوزبە-كوز كورۋ ءۇشىن كۋپيانسككە بارۋعا كەڭەس بەرگەن.
12 جەلتوقساندا ۋكراينالىق OSINT-جوبا DeepState قارۋلى كۇشتەردىڭ كۋپيانسك ماڭىندا قارسى شابۋىلعا شىققانىن جانە قالانىڭ سولتۇستىك-باتىس بولىگىن قايتارىپ العانىن حابارلادى. تاۋەلسىز اسكەري شولۋشىلاردىڭ دەرەكتەرىنشە، ۋكرايندىق كۇشتەر رەسەيلىك اسكەرلەردىڭ كۋپيانسكىنى شتۋرمداۋ ارەكەتتەرىنە قايتادان ەلەۋلى قيىندىقتار تۋعىزعان.
كۋپيانسك باعىتىنداعى جاعداي ەكى تاراپ ءۇشىن دە ستراتەگيالىق ماڭىزىن جوعالتپاي وتىر. اسكەري باقىلاۋشىلار بۇل ايماقتاعى شايقاستاردىڭ الداعى اپتالاردا دا جالعاساتىنىن بولجاۋدا.
