رەسەيدە ماسكەۋ قالالىق سوتى حالىقارالىق قىلمىستىق سوتتىڭ (حقس) پروكۋرورى مەن سۋديالارىن سىرتتاي تۇردە 3,5 جىلدان 15 جىلعا دەيىن باس بوستاندىعىنان ايىرۋ جازاسىنا كەستى، دەپ حابارلايدى "ادىرنا" ۇلتتىق پورتالى currenttime.tv-عا سىلتەپ.
بۇل تۋرالى 12 جەلتوقساندا رەسەي تەرگەۋ كوميتەتىنىڭ ءباسپاسوز قىزمەتى حابارلادى.
قىلمىستىق ءىس بويىنشا حقس پروكۋرورى كاريم حان، سۋديالار توموكو اكانە، روساريو سالۆاتورە، سەرحيو حەراردو ۋگالدە گودينەس، حايكەل بەن ماحفۋد، سونداي-اق سوت توراعاسى پەتر حوفمانسكي مەن ونىڭ ورىنباسارلارى كاررانسا لۋس دەل كارمەن يبانەس، بەرترام شميتت جانە رەنە ادەلايدا سوفي الاپيني-گانسۋ ايىپتالدى.
تەرگەۋ كوميتەتىنىڭ مالىمەتىنشە، كاريم حان 15 جىلعا باس بوستاندىعىنان ايىرىلعان. ال سۋديالارعا تاعايىندالعان ناقتى مەرزىمدەر جاريالانباعان، جالپى جازا كولەمى 3,5 جىلدان 15 جىلعا دەيىن دەپ كورسەتىلگەن.
ايىپتالۋشىلارعا كورىنەۋ كىناسىز ادامدى قىلمىستىق جاۋاپكەرشىلىككە تارتۋ، زاڭسىز قاماۋعا الۋ، حالىقارالىق قورعاۋداعى تۇلعالارعا قارسى شابۋىل جاساۋعا دايىندالۋ باپتارى بويىنشا ايىپ تاعىلعان.
تاعايىندالعان قورعاۋشىلار سوت پروتسەسى بارلىق زاڭ تالاپتارىنا ساي وتكەنىن مالىمدەگەنىمەن، ۇكىمگە شاعىم تۇسىرىلەتىنىن حابارلادى.
