رەسەي مەملەكەتتىك دۋماسىنىڭ قورعانىس كوميتەتى توراعاسىنىڭ ءبىرىنشى ورىنباسارى الەكسەي جۋراۆلەۆ قازاقستاننىڭ ناتو ستاندارتتارىنا ساي وق-ءدارى ءوندىرىسىن ىسكە قوسۋىن سىنعا الدى. ول بۇل ارەكەتتەردى «دوستىققا جاتپايتىن قادام» دەپ اتادى، دەپ حابارلايدى «ادىرنا» ءتىلشىسى گازەتا.Ru-عا سىلتەمە جاساپ.
«قازاقستان 1992 جىلى سولتۇستىك اتلانتيكالىق ىنتىماقتاستىق كەڭەسىنە قابىلداندى، ال 1994 جىلى ناتو-مەن «بەيبىتشىلىك جولىنداعى ارىپتەستىك» دەپ اتالاتىن نەگىزدەمەلىك كەلىسىمگە قول قويدى. وسى تۇستا «ناتو نەگە قازاقستانعا سونشالىقتى قىزىعۋشىلىق تانىتىپ وتىر؟» دەگەن سۇراق تۋىندايدى. مۇمكىن، رەسەيمەن شەكارالاس ەل بولعاندىقتان جانە وسى ەل ارقىلى كەزەكتى رۋسوفوبيالىق فورپوست قۇرۋعا بولادى دەگەن ماقسات بار شىعار؟» — دەدى ول.
جۋراۆلەۆتىڭ پىكىرىنشە، قازاقستان بولاشاقتا رەسەيلىك قارۋ-جاراقتان باس تارتۋدى كوزدەپ وتىر.
«سىرتتاي باۋىرلاس كورىنەتىن رەسپۋبليكانىڭ ورىس تىلىنەن عانا ەمەس، كيريلليتسادان دا تەز باس تارتقانىن بايقاماۋعا تىرىسىپ كەلەمىز. ۋكرايناعا قولداۋ ءبىلدىرىپ جاتقانىن دا كوردىك. ەندى، مىنە، ناتو ستاندارتىنداعى وق-دارىلەرگە كوشىپ جاتىر. بۇل بولاشاقتا رەسەيلىك قارۋ ۇلگىلەرىنەن باس تارتىپ، ولاردى باتىستىق نۇسقالارمەن الماستىرۋدى جوسپارلاپ وتىرعانىن اڭعارتادى. استانا رەسەيدىڭ اسكەري-ونەركاسىپ كەشەنىنىڭ ەڭ ءىرى ساتىپ الۋشىسى بولماعان شىعار، بىراق بۇل قادامنىڭ ءوزى — ءسوزسىز، دوستىققا جاتپايتىن ارەكەت جانە وعان ءتيىستى تۇردە جاۋاپ بەرۋ قاجەت. ناتو-مەن مۇنداي ىنتىماقتاستىقتىڭ كيەۆ ءۇشىن نەمەن اياقتالعانىن ءبارىمىز بىلەمىز»، — دەپ اتاپ ءوتتى ول.
بۇعان دەيىن RTVI ارناسى قازاقستاندىق جوعارى لاۋازىمدى اسكەري قىزمەتكەردىڭ پىكىرىن جاريالاعان بولاتىن. ونىڭ ايتۋىنشا، ەل اسكەرىنىڭ جاۋىنگەرلىك قابىلەتى قازاقستان اۋماعىندا قالعان كەڭەس داۋىرىندەگى قارۋ-جاراق قويمالارىنا جانە رەسەيدەن جەتكىزىلەتىن وق-دارىلەرگە تاۋەلدى بولىپ كەلگەن. اسكەري مامان ASPAN جوباسى اياسىندا ناتو ستاندارتتارىنا كوشۋ ءۇشىن ارتيللەريالىق سناريادتار مەن مينالار شىعاراتىن ءتورت زاۋىت سالىناتىنىن حابارلادى. سونداي-اق ول وق-ءدارى ماسەلەسى 2020 جىلى ايتارلىقتاي جاقسارعانىن، سول كەزدە كانادالىق كومپانيا قاراعاندى ماڭىندا اتىس قارۋىنا ارنالعان پاترون شىعاراتىن زاۋىت سالىپ بەرگەنىن اتاپ ءوتتى.
