قورعانىس مينيسترلىگى جىل باسىنان بەرى قارۋلى كۇشتەردە اسكەري قىزمەتكەرلەردىڭ قازا تابۋىنا بايلانىستى مالىمدەمە جاسادى، دەپ حابارلايدى «ادىرنا» ءتىلشىسى.
مينيسترلىك باسشىلىعى قازا بولعانداردىڭ وتباسىلارىنا، تۋعان-تۋىستارىنا جانە جاقىندارىنا كوڭىل ايتتى. ولار بولعان جاعدايدىڭ بارىنشا اۋىر ەكەنىن جانە اسكەري قىزمەت قاۋىپسىزدىگىن قامتاماسىز ەتۋ ءۇشىن جاۋاپكەرشىلىكتى تەرەڭ تۇسىنەتىندەرىن جەتكىزدى. قورعانىس ءمينيسترى داۋرەن قوسانوۆتىڭ تاپسىرماسى بويىنشا مۇنداي قايعىلى وقيعالاردىڭ الدىن الۋعا باعىتتالعان شۇعىل شارالار كەشەنى قابىلدانعان.
ء«بىرىنشى. تاربيە جۇمىسىنىڭ ۇيىمداستىرىلۋى مەن اسكەري ءتارتىپتى باقىلاۋ كۇشەيتىلدى. قارۋ-جاراقتى پايدالانۋ، ساباقتار وتكىزۋ، اتىس جاتتىعۋلارى مەن تاپسىرمالاردى ورىنداۋ كەزىندە جارعىلىق تالاپتار مەن قاۋىپسىزدىك شارالارىن ساقتاۋ تالاپتارى قاتاڭداتىلدى.
ەكىنشى. اسكەري بولىمدەرگە قارۋلى كۇشتەردىڭ جەكە قۇرامىن كەشەندى پسيحولوگيالىق تەكسەرۋدەن وتكىزۋ ءۇشىن كوميسسيالار جىبەرىلدى. اسكەري قىزمەتشىلەردىڭ پسيحيكالىق جاي-كۇيىنە، سونداي-اق قىزمەتتىك مىندەتتەردى ورىنداۋعا پسيحولوگيالىق دايىندىق دەڭگەيىنە قايتا باعالاۋ جۇرگىزىلۋدە.
ءۇشىنشى. كومانديرلەر مەن سەرجانتتىق قۇرامنىڭ جەكە جاۋاپكەرشىلىگى ارتتىرىلدى. نەگىزگى نازار وقىس وقيعالاردىڭ الدىن الۋعا جانە قاۋىپسىز مىنەز-قۇلىق داعدىلارىن قالىپتاستىرۋعا باعىتتالدى.
ءتورتىنشى. اسكەري پوليتسيا كۇشتەرىمەن اسكەري بولىمدەردە جان-جاقتى تەكسەرۋلەر ۇيىمداستىرىلدى. جەكە قۇرامعا باقىلاۋ، بەينەباقىلاۋ، ونىڭ ىشىندە قىزمەتتەن تىس ۋاقىتتا دا، كۇشەيتىلدى.
بەسىنشى. تاۋلىك بويى باقىلاۋ ەنگىزىلىپ، قۇقىق بۇزۋشىلىقتار مەن وقيعالاردىڭ الدىن الۋعا باعىتتالعان قوسىمشا پروفيلاكتيكالىق شارالار قابىلداندى.
التىنشى. اسكەري قىزمەتشىلەردىڭ تۋىستارىمەن تۇراقتى بەينەبايلانىسى قامتاماسىز ەتىلدى. سونىمەن قاتار بولىمشە كومانديرلەرى اتا-انالارمەن رەسمي بايلانىس ارنالارى ارقىلى تۇراقتى تۇردە بايلانىستا»،-دەلىنگەن حابارلامادا.
سونداي-اق مينيسترلىك بارلىق وقيعالار بويىنشا ناقتى كادرلىق جانە تارتىپتىك شەشىمدەر قابىلدانعانىن مالىمدەدى. اتاپ ايتساق، «شىعىس» وڭىرلىك قولباسشىلىعىنىڭ قولباسشىسى، شتاب باستىعى جانە قولباسشىنىڭ تاربيە جانە يدەولوگيالىق جۇمىس جونىندەگى ورىنباسارى تارتىپتىك جاۋاپكەرشىلىككە تارتىلعان. اسكەري قىزمەتكەر قازا تاپقان اسكەري ءبولىمنىڭ كومانديرى، ونىڭ ورىنباسارى، سونداي-اق باتالون كومانديرى اتقارىپ وتىرعان لاۋازىمدارىنان بوساتىلعان.
«قابىلدانىپ جاتقان بارلىق شارالار ەڭ الدىمەن جەكە قۇرامنىڭ ءومىرى مەن دەنساۋلىعىن ساقتاۋعا جانە مۇنداي قايعىلى جاعدايلاردىڭ قايتالانۋىنا جول بەرمەۋگە باعىتتالعان. بۇل باعىتتاعى جۇمىس تۇراقتى نەگىزدە جالعاسىن تابادى»،-دەلىنگەن حابارلامادا.
