قازاقستاننىڭ تاعى بىرنەشە بانكى كورشى ەلدەن شەتەلگە 7 ترلن تەڭگە «اۋدارىلدى» دەگەن ىسكە قاتىسى بارىن جوققا شىعاردى. بۇل تۋرالى بۇعان دەيىن قازاقستان پرەزيدەنتى قاسىم-جومارت توقاەۆ مالىمدەگەن بولاتىن، دەپ حابارلايدى «ادىرنا».
«بۇل اقپارات Alatau City Bank-كە قاتىسى جوق»، - دەپ ءتۇسىندىردى بەيسەنبى كۇنى بانكتىڭ ءباسپاسوز قىزمەتى كازتاگ رەداكتسياسىنا.
«نۇربانك» وكىلدەرى قاي بانك تۋرالى ءسوز بولىپ وتىرعانىن بىلمەيتىنىن ايتتى. ال توقاەۆ سيپاتتاعان كۇماندى سحەماعا قاتىسى بارىن Bank RBK, ForteBank جانە “فريدوم بانك” تىكەلەي جوققا شىعاردى.
«بانك تسەنتركرەديت» (بتسك) زاڭنامانى، سونداي-اق قارجى ينستيتۋتتارىنا قاتىستى بارلىق تالاپتار مەن نورمالاردى قاتاڭ ساقتايتىنىن مالىمدەدى.
ء«بىز اررفر، ۇلتتىق بانك، قارجىلىق مونيتورينگ اگەنتتىگى جانە باسقا دا مەملەكەتتىك ورگاندار تاراپىنان تۇراقتى تەكسەرۋلەردەن ءوتىپ تۇرامىز. زاڭ بۇزۋشىلىقتار مەن زاڭسىز نەمەسە كۇماندى وپەراتسيالارعا قاتىسۋ دەرەكتەرى انىقتالعان جوق، بانككە قاتىستى رەتتەۋشى ورگاندار تاراپىنان ەشقانداي شارا قولدانىلعان ەمەس»، - دەپ جاۋاپ بەردى بتسك.
بۇعان دەيىن دە بىرقاتار باسقا بانك 7 ترلن تەڭگەنى شەتەلگە شىعارۋ سحەماسىنا قاتىسى جوق ەكەنىن مالىمدەگەن.
اتاپ ايتقاندا، «وتباسى بانكىنىڭ» ءباسپاسوز قىزمەتى مۇنداي وپەراتسيالاردىڭ ولاردىڭ بانكىنە قاتىسى جوق ەكەنىن ايتتى. سونىمەن قاتار «حالىق بانك»، «التىن بانك»، «حوۋم كرەديت بانك» جانە «ەۋرازيالىق بانك» تە وزدەرىنىڭ اتالعان كۇماندى قارجى وپەراتسيالارىنا قاتىسى بارىن جوققا شىعاردى.
ەلىمىزدەگى ەڭ ءىرى ءارى كونە بانكتەردىڭ ءبىرى رەسمي تۇسىنىكتەمە بەرۋگە ۋاقىت سۇراسا، وزگە بانكتەر رەداكتسيادان ەلەكتروندى پوشتا ارقىلى رەسمي سۇراۋ جولداۋدى وتىنگەن. ال «بانك تسەنتركرەديت» جۋرناليستىك ساۋالعا ەرەكشە تالاپ قويعان جالعىز بانك بولىپ شىقتى.
ەسكە سالايىق، 28 قاڭتار كۇنى قارجىلىق مونيتورينگ اگەنتتىگىندە وتكەن كەڭەستە توقاەۆ اگەنتتىك توراعاسى جانات ەليمانوۆتىڭ بايانداماسىنا سىلتەمە جاساپ، 2025 جىلى كورشى ەلدەن ءبىر قازاقستاندىق بانك ارقىلى باسقا ەلدەرگە 7 ترلن تەڭگەدەن استام قارجى «اۋدارىلعانىن» ايتقان. وسىعان بايلانىستى پرەزيدەنت قارجىلىق مونيتورينگ اگەنتتىگىنە، قارجى نارىعىن رەتتەۋ جانە دامىتۋ اگەنتتىگىنە جانە ۇلتتىق بانككە ناقتى تاپسىرمالار بەرگەن.
كەيىن ساياساتتانۋشى عازيز ابىشەۆ توقاەۆتىڭ وسى مالىمدەمەسىنەن كەيىن قازاقستان بيلىگىنىڭ قانداي شارا قابىلداۋى مۇمكىن ەكەنى تۋرالى ءوز بولجامىمەن ءبولىستى
