سوڭعى ەكى اپتادا جاپونيانىڭ سولتۇستىك وڭىرلەرىندە جاۋعان قالىڭ قار جولداردى جاۋىپ، شامامەن 40 ادامنىڭ ءومىرىن قيدى، دەپ حابارلايدى "ادىرنا" ۇلتتىق پورتالى Nikkei-گە سىلتەپ.
Nikkei باسىلىمىنىڭ مالىمەتىنشە، تابيعي اپات سالدارىنان شامامەن 400 ادام زارداپ شەككەن. قايعىلى جاعدايلاردىڭ باسىم بولىگى تۇرعىنداردىڭ ۇيلەرىنىڭ شاتىرىنداعى قاردى تازالاۋ كەزىندە قۇلاپ كەتۋىنەن بولعان.
جاپونيا مينيسترلەر كابينەتىنىڭ باس حاتشىسى مينورۋ كيحارا ازاماتتاردى قاۋىپسىزدىك شارالارىن ساقتاۋعا شاقىردى. ونىڭ ايتۋىنشا، قار تازالاۋ كەزىندە مىندەتتى تۇردە كاسكا كيىپ، ساقتاندىرۋ ارقانىن پايدالانۋ قاجەت.
داۋىل ەلدىڭ 15 پرەفەكتۋراسىنا اسەر ەتكەن. كەيبىر اۋدانداردا قاردىڭ قالىڭدىعى 2 مەترگە دەيىن جەتكەنى حابارلاندى. ماماندار مۇنداي اۋا رايى جاپون ارحيپەلاگىنا اركتيكادان كەلگەن سۋىق اۋا ماسساسىنىڭ اسەرىنەن بولعانىن ايتادى.
