2026 جىلعى 9 اقپاندا استانا قالاسىنداعى دوستىق ۇيىندە قازاقستان حالقى اسسامبلەياسىنىڭ عىلىمي-ساراپشىلىق كەڭەسىنىڭ وتىرىسى ءوتتى. وتىرىس بارىسىندا قاتىسۋشىلار جاڭا كونستيتۋتسيا جوباسىن جانە ونىڭ قوعامدىق بىرلىكتى مەن ەتنوسارالىق كەلىسىمدى نىعايتۋعا باعىتتالعان نەگىزگى ەرەجەلەرىن بەلسەندى تۇردە قولدادى.
ساراپشىلار جۇرگىزىلىپ جاتقان كونستيتۋتسيالىق رەفورمالاردىڭ ەرەكشە تاريحي ماڭىزىن اتاپ ءوتىپ، ولاردىڭ مەملەكەت پەن قوعام اراسىنداعى تۇراقتى ديالوگتى دامىتۋدا قوعامدىق ينستيتۋتتاردىڭ ءرولىن ارتتىرۋعا باعىتتالعانىن جەتكىزدى.
ءوز سوزىندە قحا عىلىمي-ساراپشىلىق كەڭەسىنىڭ توراعاسى، فيلوسوفيا، ساياساتتانۋ جانە ءدىنتانۋ ينستيتۋتىنىڭ باس ديرەكتورى ايگۇل سادۋاقاسوۆا: «قازاقستان قوعامىنداعى ادىلەتتىلىك – بۇل قوعام مەن تۇلعا اراسىنداعى، ونىڭ الەۋمەتتىك قاتىناستار جۇيەسىندەگى ورنى مەن رولىنە قاتىستى، قۇقىقتارى مەن بوستاندىقتارىنىڭ ىسكە اسۋ دەڭگەيىمەن ايقىندالاتىن كونسەنسۋس»، – دەپ اتاپ ءوتتى.
سونداي-اق «التەرناتيۆا» وزەكتى زەرتتەۋلەر ورتالىعىنىڭ ديرەكتورى، قحا عىلىمي-ساراپشىلىق كەڭەسىنىڭ مۇشەسى، ساياسي عىلىمدارىنىڭ كانديداتى اندرەي چەبوتارەۆ ۇسىنىلىپ وتىرعان رەفورمالاردىڭ بيلىكتىڭ ينستيتۋتسيونالدىق تەپە-تەڭدىگىن نىعايتۋداعى ماڭىزىن اتاپ ءوتتى. ونىڭ پىكىرىنشە: «جۇرگىزىلىپ جاتقان رەفورما – ەلدىڭ ساياسي جاڭعىرۋىنىڭ نەگىزگى كەزەڭدەرىنىڭ ءبىرى جانە ول، اسىرەسە بىرلىك پەن ەتنوسارالىق كەلىسىمدى نىعايتۋ سالاسىندا، بازالىق قۇندىلىقتار مەن قاعيداتتارعا اسەر ەتەدى».
قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ عىلىمي قىزمەت جونىندەگى ۆيتسە-رەكتورى ءاليا ماساليموۆانىڭ ايتۋىنشا، «جاڭا كونستيتۋتسيا جوباسىنىڭ وزەگىندە ادام، ونىڭ قۇقىقتارى، الەۋمەتتىك قورعالۋى جانە تۇراقتىلىق پەن بەيبىتشىلىك جاعدايىندا ءوز الەۋەتىن جۇزەگە اسىرۋ مۇمكىندىگى تۇر».
قحا رەسپۋبليكالىق ەتنومەدياتسيا كەڭەسىنىڭ جانە وزبەك ەتنومادەني ورتالىعىنىڭ توراعاسى شەرزود پۋلاتوۆتىڭ پىكىرىنشە، «وكىلدىك، ينكليۋزيۆتىلىك جانە اشىق ديالوگ قاعيداتتارىنا نەگىزدەلگەن مەملەكەت پەن قوعامنىڭ ءوزارا ارەكەتتەسۋىنىڭ جاڭا مودەلىن بەكىتەتىن پلاتفورما رەتىندە ەلىمىزدىڭ جوعارى كونسۋلتاتيۆتىك ورگانى مارتەبەسىنە يە بولاتىن «قازاقستان حالىق كەڭەسىن» قۇرۋ ۇسىنىلىپ وتىر».
قازاقستان قىرعىزدارى قاۋىمداستىعىنىڭ توراعاسى شاۆكات يسمايلوۆ تا جاڭا وزگەرىستەردى قولداپ، «نەگىزگى زاڭ جوباسىن تالقىلاۋ – ۇلتتىڭ كەمەلدەنۋىنىڭ، ءوز بولاشاعىنا دەگەن جاۋاپكەرشىلىگىنىڭ كورىنىسى» ەكەنىن اتاپ ءوتتى.
وتىرىس قورىتىندىسى بويىنشا قحا عىلىمي-ساراپشىلىق كەڭەسىنىڭ مۇشەلەرى جۇرگىزىلىپ جاتقان رەفورمالاردى قولداۋ جونىندە ۇندەۋ جاساپ، جاڭا كونستيتۋتسيانى قابىلداۋدىڭ قاجەتتىلىگىمەن تولىق ىنتىماقتاس ەكەندەرىن ءبىلدىردى.
