مەكتەپ اۋلاسىندا مەملەكەتتىك رامىزدەردى جويۋعا قاتىستى ۆيدەو الەۋمەتتىك جەلىدە تارادى، دەپ حابارلايدى "ادىرنا" ۇلتتىق پورتالى.
پاۆلودار قالاسىندا مەكتەپ اۋلاسىندا مەملەكەتتىك تۋ ورتەلىپ، ەلتاڭبا سىندىرىلعان ۆيدەو الەۋمەتتىك جەلىلەردە تاراپ، قوعامدا قىزۋ تالقىلاۋعا سەبەپ بولدى.
وقيعا 5 اقپاندا ءماشھۇر ءجۇسىپ اتىنداعى مەكتەپ اۋلاسىندا بولعان. كادرلاردا ءبىر توپ ادامنىڭ شەلەكتە مەملەكەتتىك تۋدى ورتەپ، كەيىن بىرنەشە ادامنىڭ بالعامەن ەلتاڭبانى سىندىرىپ جاتقانىن كورۋگە بولادى.
قالالىق ءبىلىم ءبولىمى بۇل جاعدايعا تۇسىنىكتەمە بەرىپ، اتالعان ارەكەتتەر ۆانداليزم ەمەس، تالاپقا ساي كەلمەيتىن مەملەكەتتىك رامىزدەردى جوسپارلى تۇردە ۋتيليزاتسيالاۋ جۇمىستارى بولعانىن مالىمدەدى. جۇمىس ارنايى كوميسسيا ارقىلى جۇرگىزىلىپ، ءتيىستى اكتىمەن راسىمدەلگەن. ال ۆيدەو تەك قىزمەتتىك ەسەپ ءۇشىن تۇسىرىلگەن.
ۆەدومستۆونىڭ مالىمەتىنشە، ءىس-شارانى ۇيىمداستىرۋ مەن وتكىزۋ كەزىندە باقىلاۋدىڭ جەتكىلىكسىز بولۋىنا بايلانىستى مەكتەپ ديرەكتورىنا قاتاڭ سوگىس جاريالانعان. قىزمەتتىك ۆيدەونى الەۋمەتتىك جەلىگە كىم تاراتقانى ازىرگە انىقتالماعان.
مامانداردىڭ ايتۋىنشا، ۇلتتىق ستاندارتتارعا سايكەس كەلمەيتىن نەمەسە توزعان مەملەكەتتىك رامىزدەر ارنايى كوميسسيا شەشىمىمەن جويىلادى. ولار قايتا قولدانۋعا بولمايتىنداي ەتىپ ورتەلەدى، بالقىتىلادى نەمەسە ۇساق بولشەكتەرگە بولىنەدى.
سونىمەن قاتار، رامىزدەردى زاڭسىز پايدالانۋ اكىمشىلىك جاۋاپكەرشىلىككە اكەلەدى. ال ولاردى قورلاۋ فاكتىلەرى بويىنشا ايىپپۇل سالۋ، قوعامدىق جۇمىستارعا تارتۋ نەمەسە ەكى جىلعا دەيىن باس بوستاندىعىنان ايىرۋ جازاسى قاراستىرىلعان.
