فرانتسيالىق قازاق مودەلى پەر اۋەلبەكوۆ الەمنىڭ ەڭ ايگىلى ءسان ءۇيى Balenciaga-نىڭ كورسەتىلىمدەرىندە ونەر كورسەتۋدە. پەر وسى ارقىلى قازاقستان اتىن حالىقارالىق ءسان ساحناسىندا تانىتىپ، ءسان يندۋسترياسىنداعى تانىمال برەندتى ءوز ەلىمىزدىڭ مادەنيەتىمەن بايلانىستىرۋدا.
ول Balenciaga-نىڭ زاماناۋي جانە ءساندى كيىمدەرىن الەمدىك دەڭگەيدە كورسەتىپ ءجۇر.
پەر اۋەلبەكوۆ – قازاقستاننىڭ بەلدى تۇلعالارىنىڭ ءبىرى سەيىتقاسىم اۋەلبەكوۆتىڭ ۇلى. سەيىتقاسىم اۋەلبەكوۆ – فرانتسياداعى قازاقستان ازاماتتارىنىڭ اسسوتسياتسياسىن قۇرۋشىلاردىڭ ءبىرى، سونداي-اق وتانىمىزداعى مادەني بايلانىستاردى نىعايتۋعا ۇلكەن ۇلەس قوسقان ادام، ماماندىعى – فيلوسوف. پەردىڭ اناسى — قازاق جىلقىلارى مەن بيىك تاۋلى جايىلىمداردىڭ تاريحى تۋرالى بىرنەشە كىتاپتىڭ اۆتورى جانە الەمگە ايگىلى عالىم.
Balenciaga – ءسان يندۋسترياسىندا 1919 جىلى يسپاندىق ديزاينەر كريستوبال بالەنسياگا نەگىزىن قالاعان ءسان ءۇيى. بۇل برەند پاريجدە ورنالاسىپ، قازىر فرانتسۋزدىق Kering توبىنىڭ قۇرامىندا. Balenciaga جوعارى ءسان الەمىندە ۇلكەن ىقپالى بار برەند سانالادى. كەزىندە بىرنەشە رەت جابىلىپ، قايتا اشىلعانىمەن، ءاردايىم الەمنىڭ ەڭ ىقپالدى ءسان ءۇيى بولىپ قالدى.
Balenciaga ءسان ءۇيىنىڭ كرەاتيۆتى ديرەكتورى 2015 جىلدان 2025 جىلعا دەيىن بولعان گرۋزين ديزاينەرى دەمنا گۆاساليا كوپشىلىكتىڭ ىقىلاسىنا بولەندى. ول ءوزىنىڭ ەرەكشە، زاماناۋي كوزقاراسى مەن جاڭاشىل يدەيالارىمەن ءسان الەمىندە ايتارلىقتاي وزگەرىستەر ەنگىزدى. الايدا 2025 جىلدىڭ ناۋرىز ايىندا دەمنا گۆاساليا Gucci برەندىنىڭ شىعارماشىلىق ديرەكتورى قىزمەتىنە اۋىساتىندىعى بەلگىلى بولدى.
پەر اۋەلبەكوۆ ءسان الەمىندە تانىلعان العاشقى قازاق مودەلى ەمەس. بۇعان دەيىن فرانتسيادا تاعى ءبىر قازاقستاندىق مودەل ارمان سمايل ءوز تالانتىمەن كوزگە تۇسكەن بولاتىن. ارمان سمايل قازىرگى تاڭدا تانىمال تاۋەلسىز فوتوگراف لۋي تەرانومەن جۇمىس ىستەي باستادى. وسىلايشا، قازاقستاننىڭ جاس مودەلدەرى ءوز تالانتتارىن الەمگە تانىتىپ، حالىقارالىق دەڭگەيدە تابىستارعا قول جەتكىزۋدە.
