الماتىداعى قازاقستان رەسپۋبليكاسىنىڭ ۇلتتىق ورتالىق مۋزەيىندە «التىن وردا» اتتى جاڭا ەكسپوزيتسيالىق زال اشىلدى، دەپ حابارلايدى "ادىرنا" ۇلتتىق پورتالى kazmuseum.kz-كە سىلتەپ.
ەكسپوزيتسيادا مۋزەي قورىنان الىنعان XIII–XIV عاسىرلارعا جاتاتىن 200-دەن استام جادىگەر قويىلعان. ولار التىن وردانىڭ مادەنيەتى، تۇرمىسى مەن قوعامدىق ءومىرىن كورسەتۋگە ارنالعان.
زالدىڭ «قالالىق مادەنيەت» بولىمىندە سول ءداۋىر تۇرعىندارى مەن بيلەۋشىلەردىڭ قولدانعان تۇرمىستىق بۇيىمدارى مەن زەرگەرلىك اشەكەيلەر كورسەتىلگەن. سونداي-اق، الماتى وبلىسى شەڭگەلدى اۋىلى ماڭىنان تابىلعان، شاعاتاي اۋلەتىنىڭ جوعارى كوشپەلى اقسۇيەكتەرىنە تيەسىلى سالتاناتتى كيىمدەر مەن جىبەك ماتالار فراگمەنتتەرى ۇسىنىلعان.
«التىن وردانىڭ اسكەري ونەرى» بولىمىندە اسكەري كيىم ۇلگىلەرى مەن قارۋ-جاراقتار – جەبە ۇشتارى، قىلىشتار، قورامساقتار جانە باسقا دا بۇيىمدار كورەرمەن نازارىنا ۇسىنىلادى.
«مەملەكەتتىك قۇرىلىم» ءبولىمى التىن وردانىڭ باسقارۋ جۇيەسىن تانىستىرىپ، بيلەۋشىلەر شەجىرەسى ارقىلى قازاق حاندىعىمەن تاريحي ساباقتاستىقتى ايقىندايدى.
مۋزەي باسشىلىعى ەكسپوزيتسيانىڭ كورەرمەندەرگە التىن وردا ءداۋىرىنىڭ مادەني، ساياسي جانە اسكەري ءومىرىن جان-جاقتى تانىستىرۋعا باعىتتالعانىن اتاپ ءوتتى.
