اقمولا وبلىسىندا ورنالاسقان «پالاۋ ورتالىعى» ءدامحاناسىندا بولعان جارىلىسقا بايلانىستى كاسىپ يەسى قاماۋعا الىندى، دەپ حابارلايدى "ادىرنا" ۇلتتىق پورتالى.
رەسمي مالىمەتكە سايكەس، 2026 جىلعى 2 ناۋرىزدا ءدامحانا يەسى ۋاقىتشا ۇستاۋ يزولياتورىنا قامالعان. وعان قاتىستى قازاقستان رەسپۋبليكاسى قىلمىستىق كودەكسىنىڭ 292-بابىنىڭ 3-بولىگى بويىنشا ء(«ورت قاۋىپسىزدىگى تالاپتارىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوعۋ») قىلمىستىق ءىس قوزعالدى.
تەرگەۋ دەرەكتەرىنە ساي، اتالعان وقيعادا گاز باللونى جارىلىپ، سالدارىنان سەگىز ادام قازا تاپقان. قايعىلى جاعدايدىڭ اۋقىمى مەن ادام شىعىنىن ەسكەرە وتىرىپ، ءىس ارنايى پروكۋرورلاردىڭ وندىرىسىنە بەرىلگەن. تەرگەۋ بارىسى قازاقستان رەسپۋبليكاسىنىڭ باس پروكۋراتۋراسى تاراپىنان ەرەكشە باقىلاۋعا الىنعان.
قاداعالاۋ ورگانىنىڭ حابارلاۋىنشا، قازىرگى ۋاقىتتا قاجەتتى تەرگەۋ امالدارى جۇرگىزىلىپ جاتىر. قىلمىستىق ءىس بويىنشا وزگە اقپاراتتار قازاقستان رەسپۋبليكاسى قپك-ءنىڭ 201-بابىنا سايكەس جاريا ەتىلمەيدى.
