يراندا قىزدارعا ارنالعان باستاۋىش مەكتەپ ماڭىندا بولعان راكەتالىق سوققىعا قاتىستى جاڭا دەرەكتەر پايدا بولدى. ساراپشىلاردىڭ تالداۋىنشا، اسكەري بازاعا امەريكالىق زىمىران سوعىلعان بولۋى مۇمكىن. بۇل تۋرالى ۆۆس جازدى، دەپ حابارلايدى "ادىرنا".
Mehr News Agency اگەنتتىگى جاريالاعان بەينەجازبانى BBC Verify جۋرناليستەرى تەكسەرىپ، ساراپشىلارعا ۇسىنعان. بەينەجازبا يراننىڭ وڭتۇستىگىندەگى ميناب قالاسىندا تۇسىرىلگەن. وندا قىزدارعا ارنالعان Shajareh Tayebeh مەكتەبىنىڭ جانىندا ورنالاسقان اسكەري نىسانعا سوققى بەرىلگەن ءسات كورىنەدى.
بەينەماتەريالدى ساراپتاعان ماماندار سوققى الدىندا كادردا كورىنگەن زىمىراننىڭ Tomahawk بولۋى مۇمكىن ەكەنىن ايتادى. بۇل زىمىران اقش قارۋلى كۇشتەرىنىڭ قارۋ-جاراعىندا بىرنەشە ونداعان جىلدان بەرى قولدانىلىپ كەلەدى.
بۇعان دەيىن دونالد ترامپ مەكتەپكە جاسالعان شابۋىلعا يران جاۋاپتى ەكەنىن مالىمدەگەن ەدى. ال يران بيلىگى كەرىسىنشە، بۇل سوققى سىرتتان جاسالعانىن ايتقان.
يراننىڭ رەسمي دەرەكتەرىنە سايكەس، راكەتالىق سوققى سالدارىنان 168 ادام قازا تاپقان. ولاردىڭ شامامەن 110-ى بالالار.
ساراپشىلاردىڭ ايتۋىنشا، جاريالانعان بەينەجازبادا سوققى جاسالار ءساتتىڭ الدىندا اسكەري نىسانعا باعىتتالعان زىمىران انىق كورىنەدى. بۇل نىسان يسلام رەۆوليۋتسيالىق گۆارديا كورپۋسىنىڭ بازاسىنا تيەسىلى بولۋى مۇمكىن.
زىمىران ءتۇرىن ءۇش تاۋەلسىز ساراپشى راستاعان. ولاردىڭ ءبىرى - Mackenzie Intelligence Services كومپانياسىنىڭ اعا تالداۋشىسى. ونىڭ ايتۋىنشا، بەينەجازباداعى وق-ءدارى «ۇشۋدىڭ سوڭعى كەزەڭىندەگى Tomahawk زىمىرانىنا ءتان بارلىق بەلگىلەرگە يە».
ساراپشىلار بۇل دەرەكتەر شابۋىلدىڭ ناقتى قاي تاراپتان جاسالعانىن انىقتاۋعا كومەكتەسۋى مۇمكىن ەكەنىن ايتادى. الايدا وقيعاعا قاتىستى تەرگەۋ ءالى دە جالعاسىپ جاتىر.
