ءماجىلىس توراعاسى، «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ جەتەكشىسى ەرلان قوشانوۆ «ەگەمەن قازاقستان» گازەتىنە بەرگەن سۇحباتىندا كەيىنگى جىلدارى قازاقستاندىقتاردىڭ وي-ساناسى ۇلكەن وزگەرىستەردى باستان كەشىرگەنىنە نازار اۋداردى.
ول 2022 جىلدان بەرى پرەزيدەنتتىك سايلاۋ جونىندەگى رەسپۋبليكالىق شتاب پەن رەفەرەندۋم وتكىزۋ جونىندەگى كواليتسيا قۇرامىندا ەل وڭىرلەرىن بىرنەشە رەت ارالاپ شىققانىنا توقتالدى. سپيكەردىڭ ايتۋىنشا، ول ءار ساپار سايىن قوعامىمىزدىڭ ساياسي تۇرعىدان تولىسىپ كەلە جاتقانىن بايقاعان.
– ءبىزدىڭ كوز الدىمىزدا جاۋاپكەرشىلىك پەن جاناشىرلىقتان باستاۋ الاتىن جاڭا ساياسي مادەنيەت قالىپتاسىپ جاتىر. بۇل – ەڭ الدىمەن مەملەكەت باسشىسىنىڭ رەفورماتورلىق باستامالارىنىڭ، باعىتىنىڭ ناتيجەسى. ەل تاعدىرىنا قاتىستى بارلىق شەشىمدى حالىقتىڭ ءوزى قابىلدايتىنى تۋرالى پرەزيدەنت ءجيى ايتادى. مىنە، بۇگىن سول قاعيدانىڭ ناقتى ىسكە اسقانىنا كۋا بولىپ وتىرمىز. قازىر ازاماتتار ەش نارسەگە بەي-جاي قارامايدى. قىزۋ تالقىلايدى، ۇسىنىس-پىكىرلەرىن ايتادى، اشىق تاڭداۋىن جاساي الادى. ءار ادامنىڭ داۋىسى بولاشاقتى ايقىندايتىنىن تەرەڭ تۇسىنەدى، – دەدى ءماجىلىس توراعاسى.
ەرلان قوشانوۆتىڭ پىكىرىنشە، بۇل قۇبىلىس «حالىقپەن بىرگە» ءپرينتسيپىنىڭ جەمىستى جۇزەگە اسىپ جاتقانىن كورسەتەدى. ياعني ازاماتتاردىڭ باستاماسى، بەلسەندىلىگى، وي-ساناسى تۇبەگەيلى وزگەردى. قازىر ولاردى جەكە باس ماسەلەسى ەمەس، ەلدىڭ ەرتەڭى، ۇلتتىڭ بولاشاعى تولعاندىرادى.
سونداي-اق ءماجىلىس توراعاسى كواليتسيا مۇشەلەرىنىڭ ەل اۋماعىندا تۇرعىندارمەن، زيالى قاۋىم وكىلدەرىمەن، عالىمدارمەن، ەڭبەك ۇجىمدارىمەن ونداعان مىڭ كەزدەسۋ وتكىزگەنىنە توقتالدى. تۇتاستاي العاندا بۇل – ميلليونداعان اداممەن اراداعى تىكەلەي ءارى اشىق ديالوگ. ءماجىلىس توراعاسى وسى كەزدەسۋلەردەگى ايرىقشا اتموسفەرا – شىنايى ءارى ەمەن-جارقىن جۇزدەسۋلەر ەرەكشە ەسىندە قالعانىن ايتتى.
– ادامدار كونستيتۋتسيانى قالاي تۇسىنەتىنىن، ءوز ءۇمىت-تىلەگىن، جوسپارىن، كەيدە تولعاندىرعان ماسەلەلەرىن ورتاعا سالدى. ءتىپتى ومىرلىك تاجىريبەلەرىن ءسوز ەتىپ، ونى كونستيتۋتسيا جوباسىن قۇپتاۋدىڭ سەبەبى رەتىندە باياندادى. جاڭا اتا زاڭدى قولداۋعا جىر ارناعاندار دا بولدى، – دەدى ەرلان قوشانوۆ.
ءماجىلىس سپيكەرى ايتىپ وتكەندەي، وڭىرلەرگە ساپارلار كەزىندە ۇگىت-ناسيحاتپەن قاتارلاسا بۇقارالىق اقپارات قۇرالدارى مەن الەۋمەتتىك جەلىلەردە دە جۇيەلى جۇمىس ۇيىمداستىرىلدى. ەرلان قوشانوۆ جەتەكشى پارتيالار مەن ۇكىمەتتىك ەمەس ۇيىمداردىڭ جۇمىلىپ اتقارعان اۋقىمدى ءارى ورتاق جۇمىس ارقىلى كواليتسيا ەلىمىزدىڭ ءار ايماعىنداعى ازاماتتارعا پرەزيدەنت رەفورمالارىنىڭ ءمان-ماڭىزىن ۇعىندىرعانىنا سەنىم ءبىلدىردى. سونىڭ ناتيجەسىندە ءاربىر ازامات وسى وزگەرىستەردەن ءوز جانىنا جاقىن ءارى ماڭىزدى دۇنيەلەر تاپتى. وتباسىنىڭ، ءوز بولاشاعىنىڭ جانە تۇتاس مەملەكەتتىڭ مۇددەسىنە ساي كەلەتىن قۇندىلىقتاردى بايقادى.
