بۇگىن پالاتالاردىڭ بىرلەسكەن وتىرىسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى قانات بوزىمباەۆ الاتاۋ قالاسىنىڭ ارناۋلى مارتەبەسىنە قاتىستى كونستيتۋتسيالىق زاڭ جوباسىن تانىستىردى، دەپ حابارلايدى «ادىرنا» ۇلتتىق پورتالى.
زاڭ جوباسى مەملەكەت باسشىسىنىڭ 2025 جىلعى جولداۋى مەن الاتاۋ قالاسىن دامىتۋ تۋرالى جارلىعىنا سايكەس ازىرلەنگەن. ونىڭ نەگىزگى ماقساتى – قالانىڭ جەدەل ءارى تۇراقتى دامۋىنا جاعداي جاساۋ.
جوباعا سايكەس، الاتاۋ «قارقىندى داميتىن قالا» رەتىندە ارنايى قۇقىقتىق رەجيممەن داميدى. قالا دەربەس ەكوجۇيە رەتىندە قالىپتاسىپ، جەكە قارجىلىق مودەلگە، ارنايى باسقارۋ جۇيەسىنە جانە جاڭا ينستيتۋتسيونالدىق نەگىزگە سۇيەنەدى.
حالىقارالىق تاجىريبە نەگىزىندە ازىرلەنگەن قۇجاتتا شەنچجەن، سينگاپۋر، دۋباي سىندى ءىرى قالالاردىڭ دامۋ ۇلگىلەرى ەسكەرىلگەن. ساراپشىلاردىڭ ايتۋىنشا، مۇنداي جوبالاردا باستى ءرولدى ءتيىمدى باسقارۋ مەن كەڭ وكىلەتتىكتەر اتقارادى.
الاتاۋدا ينۆەستيتسيا تارتۋعا ەرەكشە كوڭىل بولىنەدى. قازىردىڭ وزىندە جالپى قۇنى 1,8 ترلن تەڭگەنى قۇرايتىن 44 ينۆەستيتسيالىق جوبا پىسىقتالىپ، 30 مىڭعا جۋىق جاڭا جۇمىس ورنىن اشۋ جوسپارلانىپ وتىر. جوبالار قاتارىندا Mars, PepsiCo, Hyundai Green Food جانە باسقا دا ءىرى حالىقارالىق كومپانيالار بار.
زاڭ جوباسى اياسىندا:
- ارنايى باسقارۋ ورگانى – Alatau City Authority قۇرىلادى;
- ينۆەستورلار ءۇشىن ء«بىر تەرەزە» قاعيداتى ەنگىزىلەدى;
- تۇراقتى سالىقتىق جانە قۇقىقتىق رەجيم قالىپتاستىرىلادى;
- ۇزاق مەرزىمدى (30 جىلعا دەيىنگى) دامۋ ستراتەگياسى بەكىتىلەدى;
- جەر قاتىناستارى مەن ينفراقۇرىلىمدى دامىتۋعا ەرەكشە ءتارتىپ بەلگىلەنەدى.
سونداي-اق الاتاۋ قالاسى «Smart City» قاعيداتى بويىنشا دامىپ، بارلىق قىزمەتتەر تسيفرلىق فورماتتا ۇسىنىلادى. قالادا جاساندى ينتەللەكت، روبوتتاندىرۋ، اۆتونومدى كولىك جانە تسيفرلىق اكتيۆتەردى رەتتەۋ سياقتى زاماناۋي تەحنولوگيالار ەنگىزىلەدى.
ساراپشىلاردىڭ بولجامىنشا، 2050 جىلعا قاراي الاتاۋدىڭ وڭىرلىك جالپى ءونىمى 50 ملرد اقش دوللارىنا دەيىن جەتۋى مۇمكىن.
