بايقوڭىر عارىش ايلاعى الاڭىندا «بايتەرەك» بىرلەسكەن جوباسى اياسىندا «سويۋز-5» («سۇڭقار») زىمىران-تاسىعىشىنىڭ تەحنولوگيالىق ماكەتى العاش رەت ۇشىرۋ كەشەنىنە شىعارىلىپ، كەشەندى سىناقتاردان ءوتتى. بۇل سىناقتار جاڭا زىمىراندى ۇشىرۋعا دايىندىقتىڭ ماڭىزدى كەزەڭدەرىنىڭ ءبىرى سانالادى.
مامانداردىڭ مالىمەتىنشە، ماكەت 42-الاڭداعى-سىناق كورپۋسىنان 45-الاڭداعمونتاجداۋى ۇشىرۋ قۇرىلعىسىنا جەتكىزىلىپ، تىك كۇيدە ورناتىلعان. «قۇرعاق» دەپ اتالاتىن بۇل سىناق بارىسىندا زىمىرانعا وتىن قۇيىلمايدى، ونىڭ ورنىنا تاسىمالداۋ-ورناتۋ اگرەگاتى، ۇشىرۋ كەشەنىنىڭ جابدىقتارى جانە زىمىران جۇيەلەرىنىڭ ءوزارا ۇيلەسىمدىلىگى تەكسەرىلەدى.
تەكسەرۋ ناتيجەسىندە بارلىق جۇيەلەردىڭ دۇرىس جۇمىس ىستەيتىنى راستالىپ، جابدىقتاردىڭ سايكەستىگى ءساتتى وتكەن. وسىدان كەيىن ماكەت قايتادان مونتاجداۋ-سىناق كورپۋسىنا قايتارىلىپ، سوڭعى دايىندىق كەزەڭىنە جىبەرىلدى.
الدىن الا جوسپار بويىنشا، «سۇڭقار» زىمىران-تاسىعىشىن ۇشىرۋ كەشەنىنە شىعارۋ 24 ناۋرىزعا بەلگىلەنگەن. ال زىمىراننىڭ ماكەتى پايدالى جۇكتەمەمەن وتەتىن العاشقى ۇشۋ سىناعى 27 ناۋرىز كۇنى استانا ۋاقىتىمەن ساعات 16:00-دە جۇزەگە اسىرىلماق.
«بايتەرەك» جوباسى — قازاقستان مەن رەسەيدىڭ بىرلەسكەن باستاماسى. ول ەكولوگيالىق تازا وتىن پايدالاناتىن جاڭا بۋىن زىمىراندارىن ۇشىرۋعا ارنالعان ينفراقۇرىلىم قۇرۋدى كوزدەيدى. جوبا 2004 جىلى باستالىپ، 2005 جىلى سول كەزدەگى قازاقستان جانە رەسەي پرەزيدەنتتەرى نۇرسۇلتان نازارباەۆ پەن ۆلاديمير ءپۋتيننىڭ قاتىسۋىمەن رەسمي تۇردە ىسكە قوسىلعان.
ايتا كەتۋ كەرەك، «سويۋز-5» («سۇڭقار») — ورتا كلاستى، ەكى ساتىلى زىمىران. ول ەكولوگيالىق قاۋىپسىز وتىن — نافتيل مەن سۇيىق وتتەگىن پايدالانادى. جوبا ءساتتى جۇزەگە اسقان جاعدايدا، قازاقستاننىڭ عارىش سالاسىنداعى الەۋەتىن ارتتىرىپ، حالىقارالىق ۇشىرۋ نارىعىنداعى ورنىن كۇشەيتۋگە مۇمكىندىك بەرەدى.
