يزرايل ليۆاننىڭ وڭتۇستىگىن ەلدىڭ ورتالىق بولىگىمەن بايلانىستىرىپ تۇرعان كوپىردى قيراتتى، دەپ حابارلايدى “ادىرنا” ۇلتتىق پورتالى.
انادولى اگەنتتىگىنىڭ مالىمەتىنشە، 22 ناۋرىز كۇنى ليتاني وزەنى ۇستىندەگى كوپىردى قيراتقان.
يزرايل تاراپى بۇل ارەكەتتى حەزبوللا جاساقتارىنا قارۋ-جاراق جەتكىزۋ ارنالارىنىڭ جولىن كەسۋ ماقساتىمەن ءتۇسىندىردى. ەلدىڭ قورعانىس ءمينيسترى يسراەل كاتس ارمياعا ليۆاننىڭ وڭتۇستىگىندەگى كوپىرلەردى جويۋ جانە شەكارا ماڭىنداعى ۇيلەردى بۇزۋ جۇمىستارىن جەدەلدەتۋدى تاپسىرعانىن مالىمدەدى.
سونىمەن قاتار، يزرايل ارمياسىنىڭ باس شتابىنىڭ باستىعى ەيال زامير «حەزبوللاعا» قارسى قۇرلىقتاعى وپەراتسيا اۋقىمى كەڭەيەتىنىن جەتكىزدى. ونىڭ ايتۋىنشا، اسكەري ارەكەتتەر ەندى عانا باستالعان.
الايدا ليۆان بيلىگى ءيزرايلدىڭ بۇل قادامىن قاتاڭ سىنعا الدى. ەل پرەزيدەنتى دجوزەف اۋن اتالعان ارەكەتتى ايىپتادى. ال Human Rights Watch ۇيىمى ازاماتتىق ينفراقۇرىلىمدى جويۋدى «اسكەري قىلمىس» دەپ باعالادى.
Reuters اگەنتتىگىنىڭ مالىمەتىنشە، سوڭعى ون كۇندە يزرايل ليۆاننىڭ وڭتۇستىگىندەگى بىرنەشە كوپىردى قيراتقان. يزرايل تاراپى مۇنداي شارالار شەكارا ماڭىنداعى قاۋىپسىزدىكتى قامتاماسىز ەتۋ ءۇشىن قاجەت ەكەنىن العا تارتىپ وتىر.
