قاراعاندى وبلىسىندا جالپىحالىقتىق «تازا قازاقستان» اكتسياسى اياسىندا كوگالداندىرۋ جۇمىستارى جالعاسۋدا. ءبىر كۇننىڭ وزىندە وبلىس ورتالىعىندا 400 اعاش ەگىلىپ، جۇمىستار قالانىڭ بىرنەشە اۋماعىندا جۇرگىزىلدى.
قالا ورتالىعىنداعى نازارباەۆ داڭعىلى بويىنداعى اللەياعا 60 قاراعاي قوسىلدى.
ەكولوگيالىق سەنبىلىككە ەرىكتىلەرمەن بىرگە ءوڭىر باسشىسى ەرماعانبەت بولەكپاەۆ قاتىستى.
— بۇل ءبىر رەتتىك باستاما ەمەس. ءبىز اعاش ەگۋ جۇمىستارىنا تۇراقتى تۇردە قاتىسامىز جانە تۇرعىنداردى دا قوسىلۋعا شاقىرامىز. تازا اۋا ارقايسىمىزعا بايلانىستى — اعاش نەعۇرلىم كوپ بولسا، قالا ءۇشىن سوعۇرلىم پايدالى، — دەدى قاراعاندى قالالىق جاستار رەسۋرستىق ورتالىعىنىڭ وكىلى زاڭعار سەرىكوۆ.
ونىڭ ايتۋىنشا، ول تۋعان قالاسىندا ءوزى بىرنەشە اعاش ەككەن.
سونىڭ ءبىرى ءوزى ءبىلىم العان گيمنازيا ماڭىندا ءوسىپ تۇر.
قوعام بەلسەندىسى، كوگالداندىرۋ سالاسىنىڭ ارداگەرى ساكەن كەلدىباەۆ دۇرىس ءتاسىلدىڭ ماڭىزدىلىعىن اتاپ ءوتتى.
— مۇنداعى اعاشتار ەسكى بولعاندىقتان، اللەيانى كەزەڭ-كەزەڭىمەن جاڭارتىپ جاتىرمىز. كوشەتتەر جەرگىلىكتى جاعدايعا بەيىمدەلىپ تاڭدالعان، ەگۋ جۇمىستارى تەحنولوگياعا ساي جۇرگىزىلۋدە. وتكەن جىلى وسى اللەيادا ەگىلگەن اعاشتاردىڭ بارلىعى جەرسىندى. ەڭ باستىسى — تۇراقتى كۇتىم قادەت، — دەدى ول.
كوگالداندىرۋ تەك قالا ورتالىعىندا عانا جۇرگىزىلىپ جاتقان جوق. جاسىل جەلەكتەر اۋەجايعا باراتىن جول بويىندا، سونداي-اق قالانىڭ وزگە دە اۋداندارىندا ەگىلدى.
جالپى، بيىل قاراعاندىدا 25 مىڭنان استام اعاش ەگۋ جوسپارلانعان. ساياباقتار مەن گۇلزارلاردا قوسىمشا شامامەن 7 مىڭ بۇتا جانە 12 700 اعاش پايدا بولادى.
تاعى 13 مىڭنان استام اعاش قالا اۋداندارىندا، سونىڭ ىشىندە وتەمدىك كوگالداندىرۋ اياسىندا ەگىلەدى. سونىمەن قاتار الما باعىنىڭ قۇرىلۋى جالعاسادى.
اكتسيا اياسىنداعى ەكولوگيالىق سەنبىلىكتەر قاراعاندى وبلىسىنىڭ بارلىق اۋماعىندا وتۋدە.
