اقتوبەدە وقۋ-جاتتىعۋ بارىسىندا قازا تاپقان 18 جاستاعى كۋرسانتقا قاتىستى ءىس بويىنشا سوت ۇكىمى جاريالاندى، دەپ حابارلايدى "ادىرنا" ۇلتتىق پورتالى.
قايعىلى وقيعاعا بايلانىستى ەكى اسكەري قىزمەتكەر باس بوستاندىعىنان ايىرىلدى.
تەرگەۋ مالىمەتىنشە، قايعىلى جاعداي 2025 جىلدىڭ 15 شىلدەسىندە «ايبىن» اەرودرومىندا بولعان. سەكىرۋ الدىندا مايور نۇرجان ايدەنوۆ ەكىنشى كۋرس كۋرسانتى باقىت اسارباەۆتىڭ ءپاراشيۋتىن تەكسەرىپ، وعان قولمەن اشىلاتىن جۇيەمەن سەكىرۋگە رۇقسات بەرگەن. الايدا قولدانىستاعى تالاپتارعا سايكەس، مۇنداي وقۋ-جاتتىعۋ سەكىرىستەرى تەك ءماجبۇرلى تۇردە اشىلاتىن پاراشيۋتپەن ورىندالۋى ءتيىس بولعان.
تالاپتىڭ ورەسكەل بۇزىلۋى سالدارىنان شامامەن 800 مەتر بيىكتىكتە پاراشيۋت جۇيەسى ىسكە قوسىلماي، كۋرسانت جەرگە قۇلاپ، وقيعا ورنىندا كوز جۇمعان.
ءىستى اقتوبە گارنيزونىنىڭ اسكەري سوتى قارادى. سوت شەشىمىمەن مايور نۇرجان ايدەنوۆ پەن كىشى سەرجانت زامانبەك تولەگەن قىزمەتكە سالعىرت قاراۋ بابى بويىنشا كىنالى دەپ تانىلدى. ايدەنوۆ 4 جىل 6 ايعا، ال تولەگەن 5 جىلعا باس بوستاندىعىنان ايىرىلدى.
سونىمەن قاتار، سوت جابىرلەنۋشى تاراپتىڭ تالاپ ارىزىن ءىشىنارا قاناعاتتاندىرىپ، قورعانىس مينيسترلىگىن مارقۇمنىڭ وتباسىنا 20 ميلليون تەڭگە كولەمىندە مورالدىق وتەماقى تولەۋگە مىندەتتەدى.
باقىت اسارباەۆ اسكەري وتباسىندا تاربيەلەنگەن. ونىڭ اكەسى استاناداعى اسكەري بولىمدەردىڭ بىرىندە پولكوۆنيك قىزمەتىن اتقارادى. جاقىن تۋىستارىنىڭ دا باسىم بولىگى اسكەري سالادا ەڭبەك ەتكەن.
