ماڭعىستاۋ وبلىسىندا 23 ءساۋىر - ۇلتتىق كىتاپ كۇنىنە وراي كىتاپ وقۋدى ناسيحاتتاۋعا جانە وقىرماندىق مادەنيەتتى قالىپتاستىرۋعا باعىتتالعان مادەني-تانىمدىق ءارى ادىستەمەلىك ءىس-شارالار ۇيىمداستىرىلدى.
ۇلتتىق كىتاپ كۇنى اياسىندا ق.سىديىقوۆ اتىنداعى ماڭعىستاۋ وبلىستىق امبەباپ كىتاپحاناسىندا اشىق ەسىك كۇنى ۇيىمداستىرىلدى. ءىس-شارا بارىسىندا «كىتاپحاناعا كىتاپ سىيلا» اكتسياسى وتكىزىلىپ، كىتاپ جارمەڭكەسى مەن جاڭا باسىلىمداردىڭ تانىستىرىلىمى ءوتتى. سونىمەن قاتار كەلۋشىلەر ءۇشىن ينتەللەكتۋالدىق ويىندار، Quiz فورماتىنداعى ۆيكتورينالار جانە ءتۇرلى تانىمدىق باعدارلامالار ۇيىمداستىرىلىپ، كىتاپپەن مازمۇندى قارىم-قاتىناس جاساۋعا مۇمكىندىك جاسالدى.
اقتاۋ قالاسىندا وبلىستىق ءبىلىم باسقارماسىنىڭ باستاماسىمەن «كىتاپحانا ترانسفورماتسياسى: تاجىريبە، ترەندتەر، تاسىلدەر» تاقىرىبىندا وبلىستىق سەمينار ءوتتى. وعان ءوڭىردىڭ بارلىق قالا-اۋداندارىنان كەلگەن ادىسكەرلەر، مۇعالىمدەر مەن كىتاپحاناشىلار قاتىستى. سەمينار بارىسىندا ءبىلىم بەرۋ ۇيىمدارىندا كىتاپ وقۋ مادەنيەتىن دامىتۋ جانە بالالاردى كىتاپ وقۋعا تارتۋدىڭ ءتيىمدى جولدارى تالقىلاندى.
سەمينار جۇمىسى پلەنارلىق جانە پراكتيكالىق بولىمدەردەن تۇردى. اشىلۋ ءراسىمى مازمۇندى باياندامالارمەن باستالىپ، پلەنارلىق بولىمدە قاتىسۋشىلار كىتاپ وقۋدىڭ ماڭىزدىلىعىنا توقتالىپ، وقىرماندارمەن جۇمىس جۇرگىزۋدىڭ زاماناۋي تاسىلدەرىن ورتاعا سالدى. «شەبەرلىك. شىعارماشىلىق. جاڭاشىلدىق» ۇرانىمەن وتكەن پراكتيكالىق ءبولىم تاجىريبە الماسۋعا جانە كىتاپتىڭ بالالاردى تاربيەلەۋ مەن دامىتۋداعى ءرولىن تالقىلاۋعا ارنالدى.
سونداي-اق، ينتەراكتيۆتى فورماتتاعى شارالار ءوتتى. اتاپ ايتقاندا، «كىتاپ الەمىندەگى ءبىر كۇن» كۆەستى، ينتەللەكتۋالدىق ويىندار، سونداي-اق «جاساندى ينتەللەكت پەن كىتاپحانا: ءبىلىمنىڭ جاڭا كوپىرى»، «قازىرگى بالالار جانە رۋحاني قۇندىلىقتار»، «كىتاپ الەمى - رۋحاني دامۋدىڭ نەگىزى» تاقىرىپتارىندا پىكىرتالاس الاڭدارى ۇيىمداستىرىلدى.
سەمينار قورىتىندىسى بويىنشا ۇزدىك پەداگوگتەر مەن ادىسكەرلەر العىس حاتتارمەن جانە سەرتيفيكاتتارمەن ماراپاتتالدى.
سونىمەن قاتار اقتاۋ قالاسىنداعى مەكتەپتەردە «رۋحاني-ادامگەرشىلىك تاربيە» اپتالىعى اياسىندا READx فورماتىنداعى «Book Time: شابىت الاڭى» اتتى ءىس-شارا ءوتتى. شارا بارىسىندا وقۋشىلار ءتۇرلى جانرداعى كىتاپتارمەن تانىسىپ، ءوز اسەرلەرىمەن بەلسەندى ءبولىستى. ولار «وقيمىن» جانە «ويلانامىن» كارتوچكالارى ارقىلى ءوز تاڭداۋلارىن ءبىلدىرىپ، كىتاپ تۋرالى وي-پىكىرلەرىن ورتاعا سالدى. بۇل فورمات وقۋشىلاردىڭ كىتاپقا دەگەن قىزىعۋشىلىعىن ارتتىرىپ، ءوز ويىن ەركىن جەتكىزۋىنە مۇمكىندىك بەردى.
اۋدان دەڭگەيىندە دە مازمۇندى شارالار ءوتتى. تۇپقاراعان اۋدانىندا ۇلتتىق كىتاپ كۇنى مەن كىتاپحاناشىلار كۇنىنە وراي «كىتاپ پەن كىتاپحاناشى - ءبىلىمنىڭ قوس قاناتى» تاقىرىبىندا فورۋم ۇيىمداستىرىلدى. سالتاناتتى جيىن بارىسىندا سالا ۇزدىكتەرى اۋدان اكىمىنىڭ اتىنان ماراپاتتارعا يە بولدى.
فورۋم اياسىندا كىتاپحانا ءىسىنىڭ ارداگەرى، قازاقستان رەسپۋبليكاسىنىڭ مادەنيەت سالاسىنىڭ ۇزدىگى اسەم مۇقانقىزىنىڭ 75 جاس مەرەيتويى اتالىپ ءوتتى. ونىڭ سالا دامۋىنا قوسقان ەلەۋلى ۇلەسى ەرەكشە اتاپ ءوتىلىپ، كوپجىلدىق ەڭبەگىنە قۇرمەت كورسەتىلدى.
فورۋم كاسىبي تاجىريبە الماسۋ الاڭىنا اينالىپ، ارنايى شاقىرىلعان سپيكەرلەر كىتاپحانا ءىسىن دامىتۋ باعىتىندا مازمۇندى باياندامالار جاسادى.
ءىس-شارالاردىڭ قورىتىندىسىندا «جىلدىڭ ۇزدىك وقىرمانى»، «ەڭ بەلسەندى وقىرمان» جانە «ۇزدىك وقىرمان وتباسى» نوميناتسيالارى بويىنشا ۇزدىك وقىرماندار ماراپاتتالدى.
جالپى، ماڭعىستاۋ وبلىسىندا وتكەن ۇلتتىق كىتاپ كۇنىنە ارنالعان ءىس-شارالار كىتاپتىڭ قوعام ءومىرىنىڭ ماڭىزدى بولىگى ەكەنىن كورسەتىپ، ۇرپاقتار ساباقتاستىعىن نىعايتۋعا جانە ءوڭىردىڭ زياتكەرلىك الەۋەتىن ارتتىرۋعا باعىتتالدى.
