مەملەكەت باسشىسى قاسىم-جومارت توقاەۆ قازاقستاندا ەكولوگيالىق مادەنيەتتى قالىپتاستىرۋدى مەكتەپ قابىرعاسىنان باستاۋ قاجەت ەكەنىن ايتتى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، بالالارعا تابيعاتتى ايالاۋ مادەنيەتىن ەرتە جاستان ءبىلىم بەرۋ جۇيەسى ارقىلى ۇيرەتۋ ماڭىزدى.
"تازالىقتىڭ تىرەگى – تاربيە. بالالاردى ەكولوگيالىق مادەنيەت پەن ەڭبەككە مەكتەپ جاسىنان باۋلۋ قاجەت. سوندىقتان ەكولوگيالىق اكتسيالارعا وقۋشىلار مەن ستۋدەنتتەردىڭ بەلسەنە قاتىسقانى ءجون", – دەدى مەملەكەت باسشىسى.
وسىعان بايلانىستى پرەزيدەنت وقۋ-اعارتۋ مينيسترلىگىنە “جاسىل ساباقتار” جوباسىن ەنگىزۋدى تاپسىردى. اتالعان جوبا اياسىندا ءبىلىم بەرۋ ۇيىمدارىندا سۋ مەن ەنەرگيانى ۇنەمدەۋ، قورشاعان ورتانى قورعاۋ باعىتىنداعى باستامالاردى دامىتۋ كوزدەلىپ وتىر.
سونىمەن قاتار، قاسىم-جومارت توقاەۆ جاستاردىڭ ەكولوگيا سالاسىنداعى عىلىمي ىزدەنىستەرىنە مەملەكەت تاراپىنان قولداۋ كورسەتۋ قاجەتتىگىن اتاپ ءوتتى.
پرەزيدەنت “تازا قازاقستان” باستاماسىن تەك اكتسيا رەتىندە ەمەس، جالپىۇلتتىق قۇندىلىق دەڭگەيىنە كوتەرۋ قاجەت ەكەنىن جەتكىزدى.
“تازا قازاقستان” جاڭا ساپالىق دەڭگەيگە كوتەرەتىن ۇلتتىق يدەيا بولۋى ءتيىس. ونى قوعامدا ورنىقتىرۋ ءۇشىن مادەنيەت سالاسىنىڭ، اسىرەسە كرەاتيۆتى يندۋستريانىڭ الەۋەتىن ءتيىمدى پايدالانۋ قاجەت", – دەدى ول.
