بۇگىن، 29 ساۋىردە «ماحاببات سەرتى» اتتى مەدياجوبانىڭ ترەيلەرى جارىق كوردى. بۇل – تانىمال «قوزى كورپەش - بايان سۇلۋ» ەپوسىنىڭ جاساندى ينتەللەكت كومەگىمەن جاسالعان جاڭا ينتەرپرەتاتسياسى، دەپ حابارلايدى «ادىرنا» ءتىلشىسى tengrinews.kz-كە سىلتەمە جاساپ.
ءتورت بولىمنەن تۇراتىن جوبا «بايان سۇلۋ» كونديتەرلىك فابريكاسىنىڭ قولداۋىمەن جۇزەگە اسقان.
«بۇعان دەيىن ءبىز “قوزى كورپەش – بايان سۇلۋ” سپەكتاكلىن قولدادىق، ال قازىر وسى وقيعانىڭ تەحنولوگيالىق جاڭا فورماتتا جالعاسىپ جاتقانىن كورىپ وتىرمىز. بايان سۇلۋ تۋرالى اڭىز – تەك ءبىزدىڭ فابريكانىڭ اتاۋى عانا ەمەس، ول ءوزىمىزدى سايكەستەندىرەتىن مادەني كودتىڭ ءبىر بولىگى. جي-سەريال بۇل ەپوستى جاڭا قىرىنان تانىتادى. سونداي-اق ونى جاس اۋديتورياعا جاقىنداتا وتىرىپ، تۇپنۇسقانىڭ تەرەڭدىگى مەن قۇندىلىقتارىن ساقتاۋعا مۇمكىندىك بەرەدى. ءبىز مۇنداي جوبالار ءداستۇر مەن زاماناۋي ءۇردىستى قارسى قويماي، كەرىسىنشە، بىرىكتىرىپ، ۇلتتىق مۇرانى وزەكتى ەتەدى دەپ سەنەمىز»، – دەيدى «بايان سۇلۋ» اق پرەزيدەنتى تيمۋر سادىكوۆ.
«ماحاببات سەرتى» – تىيىم سالۋ، ساتقىندىق جانە قايعىلى اياقتالۋمەن بەتپە-بەت كەلگەن ەكى عاشىقتىڭ حيكاياسى. جوبا كاسىبي قازاق تىلىندەگى دىبىستاۋمەن جانە ورىس جانە اعىلشىن تىلدەرىندەگى سۋبتيترلەرمەن ۇسىنىلعان. سونىمەن قاتار كومپانيا سەريالدى قازاق تىلىنە دىبىستاۋعا كاسىبي دۋبلياج اكتەرلەرى تارتىلعانىن اتاپ ءوتتى.
