بەرليندە رەسەي پايداسىنا تىڭشىلىق جاسادى دەگەن كۇدىكپەن قازاقستان ازاماتى ۇستالدى. ونىڭ تولىق اتى-ءجونى جاريالانعان جوق، دەپ حابارلايدى «ادىرنا» ءتىلشىسى Spiegel-گە سىلتەمە جاساپ.
قۇجاتتاردا ول سەرگەي ك. دەپ كورسەتىلگەن. گەرمانيانىڭ باس پروكۋراتۋراسىنىڭ مالىمەتىنشە، ەر ادامدى فەدەرالدىق قىلمىستىق پوليتسيا باسقارماسىنىڭ قىزمەتكەرلەرى تۇتقىنداعان. 29 ساۋىردە سوت ونى قاماۋعا الۋ ماسەلەسىن قارايدى.
تەرگەۋ نۇسقاسى بويىنشا، سەرگەي ك. كەمىندە 2025 جىلدىڭ مامىر ايىنان بەرى رەسەي ارنايى قىزمەتتەرىمەن بايلانىستا بولىپ، ولارعا اقپارات بەرىپ وتىرعان. اڭگىمە، اتاپ ايتقاندا، گەرمانيانىڭ ۋكرايناعا كورسەتكەن اسكەري كومەگىنە جانە نەمىس قورعانىس ونەركاسىبىنىڭ جاعدايىنا قاتىستى دەرەكتەر تۋرالى بولىپ وتىر. ايرىقشا قىزىعۋشىلىق دروندار مەن روبوتوتەحنيكا وندىرەتىن كومپانيالارعا باعىتتالعانى ايتىلدى.
تەرگەۋشىلەر كۇدىكتىنىڭ اۆتوماگيسترالدارداعى اسكەري كولوننالاردى، سونىڭ ىشىندە ناتو ەلدەرىنىڭ كونۆويلارىن، سونداي-اق بەرليندەگى مەملەكەتتىك عيماراتتاردى سۋرەتكە تۇسىرگەنىن دە العا تارتادى. سونىمەن قاتار ول بارلاۋ قىزمەتىندەگى تانىستارىنا گەرمانياداعى ديۆەرسيا جاساۋعا قولايلى نىساندار تۋرالى اقپارات بەرىپ، ديۆەرسيالىق-تىڭشىلىق توبىنا قوسىمشا ادامداردى تارتۋدى ۇسىنعان.
سەيسەنبى كۇنى كۇدىكتىنىڭ پاتەرىندە ءتىنتۋ جۇرگىزىلدى. سونداي-اق ىسكە قاتىسى جوق دەپ سانالاتىن تاعى ءبىر ادامنىڭ ۇيىندە دە ءتىنتۋ بولعان. ءتىنتۋ ناتيجەلەرى تۋرالى بيلىك ورگاندارى حابارلاعان جوق.
قاۋىپسىزدىك قۇرىلىمدارىنداعى دەرەككوزدەردىڭ ايتۋىنشا، سەرگەي ك.-نىڭ بۇرىن ۋكرايناداعى دونەتسك وبلىسىندا رەسەي جاعىندا اسكەري ءىس-قيمىلدارعا قاتىسقانىنا قاتىستى دەرەكتەر بار.
قازاقستان سىرتقى ىستەر مينيسترلىگى ازىرگە بۇعان قاتىستى مالىمەت تاراتپادى.
ەسكە سالايىق، وتكەن جىلدىڭ 30 شىلدەسىندە پولشا بيلىگى بىدگوشش قالاسىندا ورتالىق ازيا ەلدەرىنىڭ ءبىرىنىڭ سىرتقى بارلاۋ قىزمەتىنىڭ وفيتسەرى ۇستالىپ، ءۇش ايعا قاماۋعا الىنعانىن مالىمدەگەن ەدى. كەيىننەن ونىڭ قازاقستان ازاماتى ەكەنى انىقتالدى.
