بۇگىن، 4 مامىردا اقش پرەزيدەنتى دونالد ترامپ ورمۇز بۇعازىنان كەمەلەردى شىعارۋ وپەراتسياسى باستالاتىنىن مالىمدەدى. بۇل تۋرالى ول Truth Social الەۋمەتتىك جەلىسىندە جازدى، دەپ حابارلايدى «ادىرنا» ءتىلشىسى.
ايتۋىنشا، «الەمنىڭ بارلىق ەلى» اقش-تان ورمۇز بۇعازىندا قاقتىعىس سالدارىنان بوگەلىپ قالعان كەمەلەرىن بوساتۋعا كومەك سۇراپ جۇگىنگەن.
«يراننىڭ، تاياۋ شىعىستىڭ جانە اقش-تىڭ يگىلىگى ءۇشىن ءبىز بۇل ەلدەرگە ولاردىڭ كەمەلەرىن وسى شەكتەۋلى سۋ جولدارىنان قاۋىپسىز الىپ وتەتىنىمىزدى حابارلادىق. وسىلايشا ولار ءوز ىستەرىن ەركىن ءارى تولىق جالعاستىرا الادى… بۇل ۇدەرىس Project Freedom دەپ اتالادى»، – دەدى امەريكالىق كوشباسشى.
سونىمەن قاتار ترامپ وپەراتسياعا كەدەرگى كەلتىرىلسە، اقش كۇش قولداناتىنىن ەسكەرتتى.
«ەگەر بۇل گۋمانيتارلىق پروتسەسكە قانداي دا ءبىر جولمەن كەدەرگى جاسالسا، ونداي ارەكەتتەرگە، وكىنىشكە قاراي، كۇشپەن جاۋاپ بەرۋگە تۋرا كەلەدى»، – دەپ جازدى ول.
اقش قارۋلى كۇشتەرىنىڭ ورتالىق قولباسشىلىعى (CENTCOM) مالىمەتىنشە، ورمۇز بۇعازى ارقىلى كەمەلەردىڭ ءوتۋىن قامتاماسىز ەتۋگە باعىتتالعان «بوستاندىق» وپەراتسياسىنا ۇشاقتار جانە 15 مىڭ اسكەري قىزمەتكەر جۇمىلدىرىلادى.
