ازەربايجان پارلامەنتى ەۋروپارلامەنتپەن بارلىق باعىت بويىنشا ىنتىماقتاستىقتى ۋاقىتشا توقتاتۋ تۋرالى شەشىم قابىلدادى. بۇل تۋرالى «ازاتتىق راديوسىنىڭ» ازەربايجان قىزمەتى ايتتى، دەپ حابارلايدى «ادىرنا» ءتىلشىسى.
ەو–ازەربايجان پارلامەنتتىك ىنتىماقتاستىق كوميتەتىنە قاتىسۋدى توقتاتۋ جانە «ەۆرونەست» پارلامەنتتىك اسسامبلەياسىنداعى مۇشەلىكتى توقتاتۋ ءراسىمىن باستاۋ تۋرالى شەشىم قابىلدانعان. ءراسىم اياقتالعانعا دەيىن ازەربايجان دەلەگاتسياسى بۇل ۇيىمنىڭ ءىس-شارالارىنا قاتىسپايدى دەپ كورسەتىلگەن.
ازەربايجان سىرتقى ىستەر مينيسترلىگى ەۋروپالىق وداقتىڭ ازەربايجانداعى ەلشىسى ماريانا كۋيۋندجيچتى شاقىرىپ، ەۋروپارلامەنتتىڭ 30 ساۋىردە قابىلداعان رەزوليۋتسياسىنا بايلانىستى نارازىلىق نوتاسىن تاپسىرعان.
رەزوليۋتسيادا ەۋروپارلامەنت تاۋلى قاراباقتاعى ارميانداردىڭ قۇقىقتارىن، سونىڭ ىشىندە ولاردىڭ جەكە بولمىسىن، مۇلكىن جانە مادەني مۇراسىن قورعاۋدى قولدايتىنىن راستايدى. سونداي-اق ولاردىڭ حالىقارالىق ءتيىستى كەپىلدىكتەرمەن قاۋىپسىز ءارى ەركىن تۇردە ورالۋ قۇقىعىن قولدايتىنى ايتىلعان. بۇعان قوسا، ارميان مادەني جانە ءدىني مۇراسىن جويۋعا جاۋاپتىلاردى جاۋاپقا تارتۋعا شاقىرعان. جانە دە ەۋرودەپۋتاتتار ازەربايجان تاراپىنان ارميانداردىڭ ۇستالۋىن ايىپتاپ، ولاردى دەرەۋ بوساتۋدى تالاپ ەتكەن.
ازەربايجان ءسىم-ءنىڭ پىكىرىنشە، رەزوليۋتسياداعى بۇل تۇجىرىمدار «شىندىقتى بۇرمالايدى، وبەكتيۆتىلىك پرينتسيپتەرىنە قايشى كەلەدى جانە مەملەكەتتەردىڭ ەگەمەندىگى مەن اۋماقتىق تۇتاستىعىن قۇرمەتتەۋ مىندەتتەمەلەرىنە سايكەس كەلمەيدى». ۆەدومستۆونىڭ حابارلاۋىنشا، ارميان تۇرعىندارىنىڭ قاراباق ايماعىنا قايتا ورالۋى تۋرالى ايتىلعان تۇجىرىمدار «تولىق نەگىزسىز»، ال مۇنداي ۇندەۋلەر ازەربايجاننىڭ ىشكى ىستەرىنە ارالاسۋ سيپاتىندا بولىپ وتىر.
ەسكە سالايىق، ارمەنيا مەن ازەربايجان اراسىنداعى تاۋلى قاراباققا قاتىستى اۋماقتىق داۋ 1980-جىلداردىڭ سوڭىنان بەرى جالعاسىپ كەلدى.
