تۇركىستانداعى «جەڭىس» ساياباعى اۋماعىنداعى «داڭق» مەموريالدىق كەشەنىندە ۇلى جەڭىستىڭ 81 جىلدىعىنا ارنالعان سالتاناتتى ءىس-شارا ءوتتى. تاعىلىمى مول مەرەكەلىك جيىنعا ەڭبەك جانە تىل ارداگەرلەرى، زيالى قاۋىم وكىلدەرى، اسكەري قىزمەتكەرلەر، جاستار جانە قالا تۇرعىندارى قاتىستى.
سالتاناتتى ءراسىم بارىسىندا سۇراپىل سوعىس جىلدارىندا قازا تاپقان بوزداقتاردىڭ رۋحىنا ءبىر مينۋت ۇنسىزدىك جاريالاندى. سونداي-اق «ماڭگىلىك الاۋ» باسىنا گۇل شوقتارىن قويۋ ءراسىمى ۇيىمداستىرىلىپ، مايدانگەرلەر مەن تىل ەڭبەككەرلەرىنىڭ ەرەن ەرلىگىنە تاعزىم جاسالدى.
تۇركىستان وبلىسىنىڭ اكىمى نۇرالحان كوشەروۆ كوپشىلىكتى جەڭىس مەرەكەسىمەن قۇتتىقتاپ، ەكىنشى دۇنيەجۇزىلىك سوعىسىنداعى حالقىمىزدىڭ، ارداگەرلەرىمىزدىڭ جانقيارلىق ەرلىگى مەن بەيبىت ءومىر جولىنداعى تاريحي ەڭبەگىنە توقتالدى.
– سىزدەردى ۇلى وتان سوعىسىنداعى جەڭىستىڭ 81 جىلدىعىمەن شىن جۇرەكتەن قۇتتىقتايمىن! بۇل مەرەكە – وشپەس ەرلىكتىڭ سيمۆولى. ەكىنشى دۇنيەجۇزىلىك سوعىستا قازاقتار جانقيارلىقپەن سوعىسىپ، ەرەكشە باتىرلىق تانىتتى. باتىرلارىمىز وت كەشىپ، وققا قارسى تۇردى. تىلداعى جۇرت تا جان اياماي ەڭبەك ەتىپ، جەڭىسكە ءوز ۇلەستەرىن قوستى. وسىلايشا، فاشيزمگە توسقاۋىل قويىلدى. مەملەكەت باسشىسى قاسىم-جومارت كەمەلۇلى اتاپ وتكەندەي، قازاقستان ادامزاتتىڭ ورتاق جەڭىسىنە، ادىلدىك پەن بوستاندىقتىڭ سالتانات قۇرۋىنا ولشەۋسىز ۇلەس قوستى. ەلىمىزدەن 1,2 ميلليوننان استام جاۋىنگەر مايدانعا اتتانىپ، تەڭ جارتىسى ورالمادى. ولاردىڭ اراسىنان تالاي باتىرلار مەن داڭقتى جاۋىنگەرلەر شىقتى. 500-دەن استام جەرلەسىمىز كەڭەس وداعىنىڭ باتىرى اتاندى. وڭتۇستىك وڭىرىنەن 140 مىڭنان استام ازامات سوعىسقا اتتانىپ، تەڭ جارتىسى وتان ءۇشىن قۇربان بولدى. ولاردىڭ اسقاق رۋحى مەن جانقيارلىعى – ۇمىتىلماس ونەگە. ءبىز اتالارىمىزدىڭ ەرلىگىن دارىپتەپ، كەلەر ۇرپاققا جەتكىزە بەرەمىز. بۇگىندە جەڭىستى جاقىنداتقان قارت ساربازدارىمىزدىڭ قاتارى سيرەپ بارادى. وبلىسىمىزدا ۇلى وتان سوعىسىنىڭ نەبارى 3 ارداگەرى عانا قالدى. ولار – ءتىرى تاريح، وشپەس ونەگە. سونىمەن قاتار 3 مىڭنان استام تىل ارداگەرى بار. مەملەكەت تاراپىنان ولارعا ءاردايىم قامقورلىق كورسەتىلە بەرەدى. ءبىز باتىرلارىمىزدى ەشقاشان ۇمىتپايمىز. بارشاڭىزدى جەڭىس كۇنىمەن تاعى دا قۇتتىقتايمىن! ەلىمىزدە ءاردايىم بەيبىتشىلىك ورناسىن! ۇرپاعىمىز امان، تاۋەلسىزدىگىمىز باياندى بولسىن! – دەدى نۇرالحان كوشەروۆ.
تۇركىستان وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ ارداگەرلەرگە قۇرمەت كورسەتۋ – كەيىنگى ۇرپاقتىڭ قاسيەتتى پارىزى ەكەنىن اتاپ ءوتتى.
مەرەكەلىك جيىن اياسىندا قاتىسۋشىلار «داڭق» اللەياسىن ارالاپ، ەرلىكپەن قازا تاپقان باتىرلاردىڭ ەسىمدەرى قاشالعان ەسكەرتكىشتەرگە تاعزىم ەتتى. ءىس-شارا كونتسەرتتىك باعدارلامامەن جالعاسىپ، پاتريوتتىق اندەر شىرقالدى.
ايتا كەتەيىك، بۇگىندە تۇركىستان وبلىسىندا ۇلى وتان سوعىسىنىڭ 3 ارداگەرى قالدى. ۇلى وتان سوعىسى قاتىسۋشىلارىنا تەڭەستىرىلگەن ادامدار – 1462, تىل ارداگەرلەرى – 2 082.
قازىرگى تاڭدا، ۇلى وتان سوعىسىنىڭ ارداگەرلەرى ءوڭىردىڭ ءۇش اۋدانىندا، اتاپ ايتقاندا، سايرام، سارىاعاش، جەتىساي اۋداندارىندا تۇرادى. ولارعا مەملەكەت تاراپىنان ءتيىستى قولداۋ كورسەتىلىپ كەلەدى. بيىل ارداگەرلەرگە 5 ميلليون تەڭگەدەن تاپسىرىلدى. ۇلى وتان سوعىسى قاتىسۋشىلارىنا تەڭەستىرىلگەن ادامدارعا، تىل ارداگەرلەرىنە، قايتىس بولعان سوعىس مۇگەدەكتەرىنىڭ ايەلدەرىنە دە زاڭ شەڭبەرىندە بىررەتتىك الەۋمەتتىك كومەك قاراستىرىلعان.
