قازاقستاندىق كاسىپكەر ايدىن راقىمباەۆ پەن ونىڭ جۇبايى انار راقىمباەۆا الەمدەگى ەڭ ءىرى فيلانتروپيالىق باستامالاردىڭ ءبىرى – The Giving Pledge جوباسىنا قوسىلدى، دەپ حابارلايدى ادىرنا ۇلتتىق پورتالى.
اتالعان باستاماعا قاتىسۋشىلار ءوز بايلىعىنىڭ باسىم بولىگىن قايىرىمدىلىق پەن الەۋمەتتىك جوبالارعا باعىتتاۋعا ەرىكتى تۇردە مىندەتتەمە الادى. راقىمباەۆتار – ورتالىق ازيادان وسى جوباعا قوسىلعان العاشقى وتباسى.
Forbes مالىمەتىنە سايكەس، ايدىن راقىمباەۆتىڭ بايلىعى شامامەن 1,1 ميلليارد اقش دوللارىنا باعالانادى. كاسىپكەردىڭ ايتۋىنشا، وتباسى الداعى جىلدارى ءوز كاپيتالىنىڭ 50 پايىزدان استامىن الەۋمەتتىك جانە قايىرىمدىلىق باستامالارعا جۇمساماق.
ولاردىڭ ورتاق مالىمدەمەسىندە بۇل شەشىم ومىرلىك قۇندىلىقتارىنىڭ جالعاسى ەكەنى ايتىلعان. سونداي-اق، قالعان قاراجاتتىڭ ءبىر بولىگى بالالارعا جانە كەلەسى ۇرپاققا مۇرا رەتىندە قالدىرىلاتىنى اتاپ وتىلگەن.
ء«بىز ءۇشىن The Giving Pledge قاۋىمداستىعىنا قوسىلۋ – ۇلكەن مارتەبە. بۇل شەشىم ءبىزدىڭ ۇزاق جىلدار بويى ۇستانىپ كەلە جاتقان قاعيدالارىمىزدىڭ جالعاسى. ءبىز ءومىر بويى جيناعان تاجىريبە مەن رەسۋرستى قوعام يگىلىگىنە پايدالانۋعا نيەتتىمىز»، – دەلىنگەن ولاردىڭ حاتىندا.
ايدىن راقىمباەۆتىڭ ايتۋىنشا، وتباسىنىڭ باستى باسىمدىعى – قازاقستان ىشىندەگى الەۋمەتتىك جوبالار. قاراجاتتىڭ نەگىزگى بولىگى مەكتەپتەر سالۋعا، بالالاردى قولداۋعا، ءبىلىم بەرۋ ساپاسىن ارتتىرۋعا جانە ۇلتتىق مادەنيەتتى دامىتۋعا باعىتتالادى.
بۇعان دەيىن راقىمباەۆتار «دوم مامى» جانە IQanat سياقتى جوبالار ارقىلى مىڭداعان بالاعا كومەك كورسەتكەن. بۇل باستامالار جەتىمدىك ماسەلەسىن ازايتۋعا جانە اۋىل بالالارىنا ساپالى ءبىلىم الۋعا مۇمكىندىك بەرۋگە باعىتتالعان.
ايتا كەتەيىك، راقىمباەۆ ەرلى-زايىپتىلارى الداعى ۋاقىتتا The Giving Pledge قاۋىمداستىعىنىڭ كەزەكتى جيىنىنا قاتىسادى. وندا ولاردىڭ جوباعا رەسمي قوسىلۋى جاريا ەتىلەدى.
The Giving Pledge – الەمدەگى ەڭ اۋقاتتى ادامداردى بىرىكتىرەتىن حالىقارالىق قايىرىمدىلىق باستاما. ونى بيلل گەيتس، مەليندا فرەنچ گەيتس جانە ۋوررەن باففەت نەگىزىن قالاعان. جوباعا قاتىسۋشىلار ءوز بايلىعىنىڭ باسىم بولىگىن قايىرىمدىلىققا ارناۋعا ەرىكتى تۇردە ۋادە بەرەدى.
