الماتى وبلىسىنىڭ تۇرگەن اۋىلىندا جاسوسپىرىمدەر وتىرعان كولىك 12 جاستاعى بالانى قاعىپ كەتكەن، دەپ حابارلايدى "ادىرنا" ۇلتتىق پورتالى.
وقيعادان كەيىن جوعارى سىنىپ وقۋشىلارى زارداپ شەككەن بالانى جول اپاتى بولعان جەردەن الىپ كەتىپ، ەشكىمگە ايتپاۋىن تالاپ ەتكەن دەگەن اقپارات تارادى.
الدىن الا مالىمەت بويىنشا، كولىك ىشىندە 11-سىنىپتىڭ بەس وقۋشىسى بولعان. الەۋمەتتىك جەلىدە جاريالانعان ۆيدەودا جاسوسپىرىمدەردىڭ بالانى مەكتەپ جاعىنا الىپ بارا جاتقان ءساتى كورىنەدى. سونداي-اق وقيعاعا قاتىسى بار وقۋشىلاردىڭ ءبىرى كولىكتى جاسىرۋ ءۇشىن وقيعا ورنىنان كەتىپ قالعانى ايتىلدى.
جابىرلەنۋشى تاراپتىڭ سوزىنشە، بالانى شامامەن 30-40 مينۋت بويى ۇستاپ تۇرعان. كەيىن وقۋشىلار زارداپ شەككەن بالامەن بىرگە مەكتەپكە بارىپ، مۇعالىمگە ونى موپەد قاعىپ كەتكەنىن ايتقان. الماتى وبلىستىق پوليتسيا دەپارتامەنتى كامەلەتكە تولماعان جۇرگىزۋشىنىڭ انىقتالىپ، جاۋاپكەرشىلىككە تارتىلعانىن حابارلادى. سونىمەن قاتار ونىڭ اتا-اناسىنا قاتىستى ەكى اكىمشىلىك باپ بويىنشا شارا قولدانىلعان.
پوليتسيا وكىلدەرىنىڭ مالىمەتىنشە، وقيعاعا قاتىسى بار وزگە تۇلعالاردىڭ ارەكەتىنە دە قۇقىقتىق باعا بەرىلەدى. قورىتىندى پروتسەسسۋالدىق شەشىم مەديتسينالىق ساراپتاما ناتيجەسى مەن زارداپ شەككەن بالانىڭ اۋرۋحانادان شىققاننان كەيىن قابىلدانادى.
بۇدان الدىن 13 جاستاعى ءجاسوسپىرىم اكەسىنىڭ رۇقساتىنسىز كولىك ايداپ، اپاتقا ءتۇسىپ قازا تاپقان.
