فوتو: Archer
بىرىككەن اراب امىرلىكتەرىنىڭ استاناسى ابۋ-دابيدە ۇشاتىن تاكسي قىزمەتىن ىسكە قوسۋ باعىتىنداعى ماڭىزدى كەزەڭ باستالدى. كاليفورنيالىق Archer Aviation كومپانياسى ءوزىنىڭ Midnight اتتى ەلەكترلى اەروتاكسيىنە قاتىستى سىناقتاردىڭ جاڭا كەزەڭى ءباا-دە رەسمي تۇردە باستالعانىن مالىمدەدى. بۇل تۋرالى كومپانيا جەلىگە ۆيدەو جاريالادى, دەپ حابارلايدى "ادىرنا" ۇلتتىق پورتالى.
Midnight اۋە كەمەسى شەكتەۋلى تيپتەگى سەرتيفيكات (RTC) الۋ باعدارلاماسىنا ەنگىزىلدى. بۇل – ءباا-ءنىڭ ازاماتتىق اۆياتسيا سالاسىنداعى رەتتەۋشى ورگانى General Civil Aviation Authority (GCAA) ازىرلەگەن ارنايى ءتارتىپ. اتالعان باعدارلاما تولىق كوممەرتسيالىق سەرتيفيكاتتاۋعا دەيىن ۇشۋ اپپاراتتارىنا شەكتەۋلى رەجيمدە جۇمىس ىستەۋگە مۇمكىندىك بەرەدى.
سىناق رەيستەرى الدىمەن ۇشاقتىڭ تەحنيكالىق مۇمكىندىكتەرىن، اسىرەسە امىرلىكتەردىڭ اپتاپ ىستىق كليماتىندا جۇمىس ىستەۋ قابىلەتىن تەكسەرۋگە باعىتتالعان. سونىمەن قاتار، كومپانيا ماماندارى ىقتيمال اۋە باعىتتارىن زەرتتەپ، بولاشاق جولاۋشىلار تاجىريبەسىن باعالاۋدا.
جوبا اياسىندا Abu Dhabi Aviation Group پەن Archer Aviation كومپانيالارى ىنتىماقتاستىق ورناتقان. ۇشاتىن تاكسيلەر ابۋ-دابي قالاسى ىشىندە، سونداي-اق استانا مەن Dubai اراسىندا قاتىنايدى دەپ جوسپارلانىپ وتىر.
مىسالى، ابۋ-دابي حالىقارالىق اۋەجايىنان ايگىلى Emirates Palace قوناقۇيىنە دەيىنگى جولدى 5–8 مينۋتتا ەڭسەرۋگە بولادى. قازىرگى تاڭدا بۇل باعىتتى اۆتوكولىكپەن ءجۇرىپ وتۋگە شامامەن 45 مينۋت قاجەت.
Midnight – تىك ۇشىپ-قونۋ (eVTOL) تەحنولوگياسىنا نەگىزدەلگەن ەلەكترلى اۋە كەمەسى. ول ءبىر ۇشقىش پەن ءتورت جولاۋشىنى تاسىمالداي الادى. ۇشۋ جىلدامدىعى ساعاتىنا 241 شاقىرىمعا دەيىن جەتەدى.
ۇشاق تولىقتاي ەلەكتر قۋاتىمەن جۇمىس ىستەيدى جانە قىسقا ۋاقىت ىشىندە قايتا قۋاتتالىپ، بىرنەشە رەيستى قاتار ورىنداۋعا بەيىمدەلگەن. بۇل ونى ەكولوگيالىق تۇرعىدان ءتيىمدى ءارى قالالىق ينفراقۇرىلىمعا يكەمدى كولىك قۇرالىنا اينالدىرادى.
2025 جىلعى 8 قازاندا Cleveland Clinic Abu Dhabi اۋرۋحاناسى ءوز بازاسىندا ءباا-دەگى العاشقى ۆەرتيپورت سالۋ جوسپارىن جاريالادى. بۇل الاڭ شۇعىل مەديتسينالىق كومەك كورسەتۋ جانە دونورلىق اعزالاردى جەدەل تاسىمالداۋ ماقساتىندا پايدالانىلۋى مۇمكىن.
كومپانيا وكىلدەرىنىڭ ايتۋىنشا، ابۋ-دابي الەمدەگى اەروتاكسي قىزمەتىن العاشقىلاردىڭ ءبىرى بولىپ كوممەرتسيالىق تۇردە ىسكە قوساتىن قالاعا اينالۋى ىقتيمال. بۇل جوبا ءساتتى جۇزەگە اسسا، پارسى شىعاناعى ەلدەرى ءۇشىن جاڭا اۆياتسيالىق حاب قالىپتاسۋى مۇمكىن.
ازىرگە رەسمي تاريف بەكىتىلگەن جوق. دەگەنمەن، كومپانيا وكىلدەرى باستاپقى كەزەڭدە باعالار پرەميۋم ساناتتاعى قىزمەت دەڭگەيىندە بولاتىنىن مالىمدەدى:
-
ابۋ-دابي ىشىندە – شامامەن 300–350 ديرحام;
-
ابۋ-دابي – دۋباي باعىتى – 800–1500 ديرحام.
ۋاقىت وتە كەلە قىزمەت اۋقىمى كەڭەيىپ، تيىمدىلىك ارتقان سايىن باعانى قاراپايىم تاكسي دەڭگەيىنە دەيىن تومەندەتۋ كوزدەلىپ وتىر.
