تيمۋر قۇلىباەۆتىڭ Halyk قايىرىمدىلىق قورى ەلىمىزدىڭ ءار وڭىرىنەن جينالعان 112 قازاقستاندىققا قاجىلىق ساپارىنا جولداما تابىستادى.
قاسيەتتى ساپارعا جولداما العانداردىڭ قاتارىندا ەل ىشىندەگى قاراپايىم ەڭبەك ادامدارى، اۋىل-ايماقتىڭ اقساقالدارى مەن انالارى، مەشىتتە تازالىقشى بولىپ ادال قىزمەت ەتىپ جۇرگەن جاندار بار. ولاردىڭ كوپشىلىگى ءۇشىن بۇل ساپار ۇزاق جىلدار بويى جوسپارلاپ جۇرگەن ماڭىزدى وقيعا.
جولداما يەگەرلەرىنىڭ ءبىرى Auyl Sport جوباسىنىڭ وڭىرلىك تۋرنيرىنە قاتىسقان جاسۇلان ەسىمدى بالانىڭ اتا-اپاسى. بالا جارىس كەزىندە اتا-اپاسىن قاجىلىققا اپارعىسى كەلەتىنىن ايتقان بولاتىن. بۇل وتىنىشكە نازار اۋدارعان قور وتباسىعا جولداما بەرۋ تۋرالى شەشىم قابىلدادى.
جوبا اياسىنداعى قور قاراجاتى قاجىلاردىڭ جول شىعىنىنا، اۋە بيلەتتەرىنە، مەككە مەن ءمادينا قالالارىنداعى تۇرعىن ءۇي مەن كولىك قىزمەتىنە، تاماقتانۋىنا جانە ساپاردى ۇيىمداستىرۋعا باعىتتالعان. ساپاردى «حيكمەت» تۋر وپەراتورى ۇيىمداستىرىپ وتىر.
ايتا كەتەيىك، قاجىلىققا جولداما العان ازاماتتار قازاقستاننىڭ تۇكپىر-تۇكپىرىنەن ىرىكتەلگەن. ولاردىڭ اراسىندا ايەلدەر دە، ەرلەر دە بار. جاس ەرەكشەلىگى دە، كاسىبى دە ءارتۇرلى.
16 مامىردا قاجىلار الماتى اۋەجايىنان ءمادينا مەن مەككە قالالارىنا اتتانادى. Halyk قورى بۇل يگى باستامانى ءۇشىنشى جىل قاتارىنان جالعاستىرىپ كەلەدى. 2023 جىلى 20 ادامعا، 2025 جىلى 20 ادامعا قاجىلىق ساپارىنا سەرتيفيكات تابىستالسا، بيىل 112 ادامعا جولداما تابىستالدى.
Halyk قورىنىڭ اتقارۋشى ديرەكتورى عالىمبەك جاقسىلىقۇلى جوبا تۋرالى بىلاي دەدى:
«قاجىلىق كوپ وتباسى ءۇشىن ماڭىزدى، بىراق كوبىنە قولجەتىمسىز ساپار. ءبىز بۇل جوبا ارقىلى وڭىرلەردەگى قاراپايىم ادامدارعا ەڭبەك ارداگەرلەرىنە، اۋىل تۇرعىندارىنا، كۇندەلىكتى ادال قىزمەت ەتەتىندەرگە قولداۋ كورسەتۋگە تىرىستىق. بۇل ادال ەڭبەككە دەگەن قۇرمەت».
تۇركىستان وبلىسىنان كەلگەن بايزاقوۆا زينا جولداما تۋرالى حاباردى كۇتپەگەن قولداۋ رەتىندە قابىلداعانىن ايتتى:
«بۇل مەن ءۇشىن كوپتەن جوسپارلاپ جۇرگەن ساپار، بىراق قاراپايىم وتباسىعا ونى ءوز قاراجاتىنا ۇيىمداستىرۋ وڭايعا سوقپايتىن. قوردان حابارلاسقاندا، العاشىندا سەنبەگەن ەدىم. كەيىن ءبارى راستالعاندا، قاتتى تولقىدىم. قولداۋ كورسەتكەن قورعا العىس بىلدىرەمىن»، - دەدى ول.
Halyk قايىرىمدىلىق قورى ەل تۇرعىندارىنا باعىتتالعان الەۋمەتتىك جوبالاردى الداعى ۋاقىتتا دا جالعاستىراتىنىن مالىمدەدى.
