گەرمانيا قازاقستاننىڭ بۇرىنعى باس كولىك پروكۋرورى ماقسات دۇيسەنوۆتى ەكستراديتسيالاۋدان باس تارتتى. بۇل تۋرالى باس پروكۋراتۋرا ايتتى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
«گەرماندىق تاراپ ونى بەرۋدەن سەبەبىن كورسەتپەي باس تارتقانىن حابارلايمىز. اتالعان تۇلعاعا ىزدەۋ جاريالاۋ توقتاتىلعان جوق، قىلمىستىق قۋدالاۋ جالعاسۋدا. قازىرگى ۋاقىتتا ءىس بويىنشا ءمان-جايلاردى انىقتاۋعا باعىتتالعان ءىس-شارالار، سونىڭ ىشىندە شەت مەملەكەتتەردىڭ قۇزىرەتتى ورگاندارىمەن ءوزارا ءىس-قيمىل جاساۋ ارقىلى جۇرگىزىلىپ جاتىر»،– دەلىنگەن حابارلامادا.
باس پروكۋراتۋرا دۇيسەنوۆ ءىسىنىڭ ءمان-جايىن اشىپ كورسەتپەگەن.
«قر قپك-ءنىڭ 201-بابىنىڭ تالاپتارىنا سايكەس سوتقا دەيىنگى تەرگەۋدىڭ وزگە دەرەكتەرى جاريا ەتۋگە جاتپايدى»، – دەلىنگەن ۆەدومستۆو جاۋابىندا.
ەسكە سالساق، 2025 جىلدىڭ قىركۇيەك ايىنىڭ باسىندا قازاقستاننىڭ بۇرىنعى باس كولىك پروكۋرورى ماقسات دۇيسەنوۆكە ىزدەۋ جاريالانعان بولاتىن. كەيىن ونىڭ گەرمانيانىڭ فيۋرت قالاسىندا ۇستالعانى حابارلانعان ەدى. وتكەن جىلدىڭ قازان ايىندا باس پروكۋراتۋرا وكىلدەرى ونى قازاقستانعا ەكستراديتسيالاۋ مۇمكىن ەكەنىن مالىمدەگەن.
ماقسات دۇيسەنوۆتىڭ اتى اتالىپ وتىرعان نەگىزگى ەپيزودتىڭ ءبىرى – كوپ جىلدان بەرى قوعام نازارىندا كەلە جاتقان «قورعاس ءىسى». بۇل ءىس قازاقستان-قىتاي شەكاراسىنداعى «قورعاس» كەدەن بەكەتىندە 2010 جىلداردىڭ باسىندا انىقتالعان اۋقىمدى كوررۋپتسيالىق سحەماعا بايلانىستى. 2011 جىلدىڭ سوڭىندا قارجى پوليتسياسى الماتى وبلىسىنداعى شەكارا بەكەتتەرىندە جۇيەلى جەمقورلىق پەن كونتراباندا ءجۇرىپ جاتقانىن مالىمدەگەن. تەرگەۋ دەرەكتەرىنە ساي، بىرنەشە ادامنان تۇراتىن ۇيىمداسقان قىلمىستىق توپ جىلدار بويى كەدەن بەكەتىندە زاڭسىز ارەكەتپەن اينالىسقان. ونىڭ قۇرامىندا قىلمىستىق ورتا وكىلدەرىمەن قاتار كەيبىر مەملەكەتتىك ورگان قىزمەتكەرلەرى دە بولىپتى. بۇل توپ شەكارا ارقىلى تاۋار تاسىمالىن كەدەرگىسىز وتكىزۋ ءۇشىن ءتيىستى لاۋازىمدى تۇلعالارعا پارا بەرىپ وتىرعان، وسىلايشا ميلليونداعان دوللار زاڭسىز تابىس اينالىمى قالىپتاسقان دەلىنەدى.
دۇيسەنوۆ داۋى قازاقستاننىڭ بۇرىنعى باس پروكۋرورى، ەكس-سەناتور قايرات قوجامجاروۆتىڭ توڭىرەگىندەگى سەرىكتەرىنە قاتىستى قىلمىستىق ءىستىڭ جالعاسى رەتىندە قابىلداندى.
