ەلورداداعى «EXPO» حالىقارالىق كورمە ورتالىعىندا وتاندىق كاسىپكەرلەردىڭ باسىن قوساتىن ءداستۇرلى «Ulttyq Ónim» كورمەسى توعىزىنشى رەت ءوتىپ جاتىر. ەلىمىزدىڭ تۇكپىر-تۇكپىرىنەن جينالعان 600-دەن استام كاسىپورىن ءوز ونىمدەرىن كوپشىلىككە ۇسىندى.
شارانىڭ سالتاناتتى اشىلۋىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين وتاندىق ءوندىرىستى جۇيەلى دامىتۋ مەن شاعىن جانە ورتا بيزنەستىڭ مۇمكىندىكتەرىن كەڭەيتۋدىڭ ماڭىزىنا توقتالىپ، ۇكىمەت باسشىسى ولجاس بەكتەنوۆتىڭ قۇتتىقتاۋ حاتىن وقىپ بەردى.
ەكسپوزيتسيا اياسىندا ينۆەستورلار، مەملەكەتتىك ورگاندار مەن قارجى ينستيتۋتتارى، سونداي-اق حالىقارالىق ساراپشىلار اراسىنداعى بايلانىستى نىعايتاتىن مازمۇندى ىسكەرلىك باعدارلامالار قاراستىرىلعان. فورۋم اياسىندا «كەپىلدىك – قارجىعا قول جەتكىزۋگە مۇمكىندىك بەرەتىن نەگىزگى قۇرال» اتتى پانەلدىك سەسسياسى ءوتتى. جيىن بارىسىندا كاسىپكەرلىكتى ىلگەرىلەتۋ جانە بيزنەس وكىلدەرىن وقىتۋ ماسەلەسى دە قىزۋ تالقىلاندى.
سالا ماماندارىنىڭ باسىن قوسقان تالقىلاۋ بارىسىندا Halyk Bank باسقارما ءتورايىمىنىڭ ورىنباسارى ولگا ۆۋروس ايەلدەردىڭ كاسىپپەن اينالىسۋ مۇمكىندىگىنە توقتالدى.
«ايەلدەر كاسىپكەرلىگىن قولداۋ تۋرالى ايتاتىن بولساق، بىزدە جىل سايىن ىلگەرىلەتىپ وتىراتىن ارنايى باعدارلامامىز بار. ءبىز بانكتىڭ ءوز قاراجاتى ەسەبىنەن جەڭىلدىكتى قارجىلاندىرۋ بولەمىز. بيىل بۇل جەڭىلدىكتى مولشەرلەمەلەر بويىنشا شامامەن 1 ميلليارد تەڭگەنى قۇرادى. ءبىز ايەلدەردى قارجىلاندىرامىز، بىراق جوبانى قارجىلاندىرماس بۇرىن وقىتۋدان وتكىزەمىز. وڭىرلەردى ارالاپ، قاتىسۋشىلاردى جينايمىز، ولاردى وقىتىپ، بيزنەس-جوسپار دايىنداۋعا، جوبانى تانىستىرۋدى ۇيرەتەمىز.
Visa كومپانياسىمەن بىرلەسىپ، ەڭ ۇزدىك جوبالاردى تاڭدايمىز. Visa بۇل جوبالاردى جۇزەگە اسىرۋ ءۇشىن ءوز گرانتتارىن بەرەدى. ال ءبىز بۇل ليميتتەردى بولەمىز، بىراق ولار تولىققاندى ساراپتامادان وتەدى. ياعني، ولار وتىنىممەن، ءوز بيزنەس-پلاندارىمەن جۇگىنەدى، تولىق سكورينگتىك تەكسەرىستەن وتەدى. دەمەك، بۇل جەردە «دامۋ» قورى تاراپىنان وقىتۋعا قولداۋ كورسەتىلسە، ءبىزدىڭ تاراپىمىزدان جەڭىلدىكتى مولشەرلەمەمەن قارجىلاندىرۋ ۇسىنىلادى»، - دەپ اتاپ ءوتتى Halyk Bank باسقارما ءتورايىمىنىڭ ورىنباسارى ولگا ۆۋروس.
كورمەنى ارالاپ، وتاندىق كاسىپورىنداردىڭ الەۋەتىن باعامداعان رەسمي وكىلدەر نارىقتى قولداۋدىڭ ناقتى ناتيجەلەرىن دە ءبولىستى.
«ەلىمىزدە شاعىن جانە ورتا بيزنەسكە جان-جاقتى قولداۋ كورسەتىلىپ جاتىر. قارجىلاندىرۋعا مۇمكىندىكتى مولايتۋ جانە كاسىپكەرلەردى كوپتەپ قولداۋ ماقساتىندا «دامۋ» قورى كەپىلدىك بەرۋ قۇرالدارىن ەداۋىر كەڭەيتتى. سونىمەن قاتار وڭدەۋ ونەركاسىبىنىڭ جابدىقتارىن جاڭعىرتۋعا ارنالعان «ورلەۋ» جانە «ورلەۋ-ليزينگ» جەڭىلدىكپەن نەسيەلەۋ باعدارلامالارى ارقىلى نارىقتىق قولداۋ تەتىكتەرى كۇشەيتىلدى. بۇدان بولەك، شاعىن قالالار مەن اۋىلدارداعى ميكرو جانە شاعىن بيزنەسكە كەشەندى قولداۋ كورسەتۋگە ارنالعان «ىسكەر ايماق» باعدارلاماسى ىسكە قوسىلدى.
قوردىڭ وڭىرلىك فيليالدارى بازاسىندا «بايتەرەك» حولدينگىنىڭ بيزنەستى قولداۋ باعدارلامالارى بويىنشا بىرىڭعاي فرونت-وفيستەر قۇرىلدى. ال شالعاي اۋداندار ءۇشىن ءموبيلدى فرونت-وفيستەر – كاسىپكەرلەرگە كەڭەس بەرۋ ءۇشىن ارنايى جابدىقتالعان ميكرواۆتوبۋستار ىسكە قوسىلۋدا. تەك 2025 جىلدىڭ وزىندە «دامۋ» قورى ارقىلى بيزنەستى دامىتۋعا 560 ملرد تەڭگەدەن استام قاراجات ءبولىندى. ناتيجەسىندە جالپى نەسيە كولەمى 2,2 ترلن تەڭگەنى قۇرايتىن شامامەن 13 مىڭ جوبا قولداۋ تاپتى. وسى شارالاردىڭ ارقاسىندا 14 مىڭنان استام جاڭا جۇمىس ورنى قۇرىلىپ، 143 مىڭنان استام جۇمىس ورنى ساقتالدى. كاسىپورىندار 27,7 ترلن تەڭگەنىڭ ءونىمىن ءوندىرىپ، بيۋدجەتكە شامامەن 2 ترلن تەڭگە كولەمىندە سالىق ءتۇستى»، – دەدى «دامۋ» قورى باسقارما توراعاسى فارحات سارسەكەەۆ.
كورمە سورەلەرىنەن ازىق-تۇلىك، جەڭىل جانە حيميا ونەركاسىبى، ماشينا جاساۋ، جيھاز بەن قۇرىلىس سالاسىنىڭ تاۋارلارىن تابۋعا بولادى. بيىل كورمە اۋقىمىنا قىزمەت كورسەتۋ سەكتورى قوسىلدى.
