Elordadaǧy «EXPO» halyqaralyq körme ortalyǧynda otandyq käsıpkerlerdıŋ basyn qosatyn dästürlı «Ulttyq Ónim» körmesı toǧyzynşy ret ötıp jatyr. Elımızdıŋ tükpır-tükpırınen jinalǧan 600-den astam käsıporyn öz önımderın köpşılıkke ūsyndy.
Şaranyŋ saltanatty aşyluynda Premer-ministrdıŋ orynbasary – Ūlttyq ekonomika ministrı Serık Jūmanǧarin otandyq öndırıstı jüielı damytu men şaǧyn jäne orta biznestıŋ mümkındıkterın keŋeitudıŋ maŋyzyna toqtalyp, Ükımet basşysy Oljas Bektenovtıŋ qūttyqtau hatyn oqyp berdı.
Ekspozisiia aiasynda investorlar, memlekettık organdar men qarjy instituttary, sondai-aq halyqaralyq sarapşylar arasyndaǧy bailanysty nyǧaitatyn mazmūndy ıskerlık baǧdarlamalar qarastyrylǧan. Forum aiasynda «Kepıldık – qarjyǧa qol jetkızuge mümkındık beretın negızgı qūral» atty paneldık sessiiasy öttı. Jiyn barysynda käsıpkerlıktı ılgerıletu jäne biznes ökılderın oqytu mäselesı de qyzu talqylandy.
Sala mamandarynyŋ basyn qosqan talqylau barysynda Halyk Bank Basqarma töraiymynyŋ orynbasary Olga Vuros äielderdıŋ käsıppen ainalysu mümkındıgıne toqtaldy.
«Äielder käsıpkerlıgın qoldau turaly aitatyn bolsaq, bızde jyl saiyn ılgerıletıp otyratyn arnaiy baǧdarlamamyz bar. Bız banktıŋ öz qarajaty esebınen jeŋıldıktı qarjylandyru bölemız. Biyl būl jeŋıldıktı mölşerlemeler boiynşa şamamen 1 milliard teŋgenı qūrady. Bız äielderdı qarjylandyramyz, bıraq jobany qarjylandyrmas būryn oqytudan ötkızemız. Öŋırlerdı aralap, qatysuşylardy jinaimyz, olardy oqytyp, biznes-jospar daiyndauǧa, jobany tanystyrudy üiretemız.
Visa kompaniiasymen bırlesıp, eŋ üzdık jobalardy taŋdaimyz. Visa būl jobalardy jüzege asyru üşın öz granttaryn beredı. Al bız būl limitterdı bölemız, bıraq olar tolyqqandy saraptamadan ötedı. Iаǧni, olar ötınımmen, öz biznes-plandarymen jügınedı, tolyq skoringtık tekserısten ötedı. Demek, būl jerde «Damu» qory tarapynan oqytuǧa qoldau körsetılse, bızdıŋ tarapymyzdan jeŋıldıktı mölşerlememen qarjylandyru ūsynylady», - dep atap öttı Halyk Bank Basqarma töraiymynyŋ orynbasary Olga Vuros.
Körmenı aralap, otandyq käsıporyndardyŋ äleuetın baǧamdaǧan resmi ökılder naryqty qoldaudyŋ naqty nätijelerın de bölıstı.
«Elımızde şaǧyn jäne orta bizneske jan-jaqty qoldau körsetılıp jatyr. Qarjylandyruǧa mümkındıktı molaitu jäne käsıpkerlerdı köptep qoldau maqsatynda «Damu» Qory kepıldık beru qūraldaryn edäuır keŋeittı. Sonymen qatar öŋdeu önerkäsıbınıŋ jabdyqtaryn jaŋǧyrtuǧa arnalǧan «Örleu» jäne «Örleu-lizing» jeŋıldıkpen nesieleu baǧdarlamalary arqyly naryqtyq qoldau tetıkterı küşeitıldı. Būdan bölek, şaǧyn qalalar men auyldardaǧy mikro jäne şaǧyn bizneske keşendı qoldau körsetuge arnalǧan «Isker aimaq» baǧdarlamasy ıske qosyldy.
Qordyŋ öŋırlık filialdary bazasynda «Bäiterek» holdingınıŋ biznestı qoldau baǧdarlamalary boiynşa Bıryŋǧai front-ofister qūryldy. Al şalǧai audandar üşın mobildı front-ofister – käsıpkerlerge keŋes beru üşın arnaiy jabdyqtalǧan mikroavtobustar ıske qosyluda. Tek 2025 jyldyŋ özınde «Damu» qory arqyly biznestı damytuǧa 560 mlrd teŋgeden astam qarajat bölındı. Nätijesınde jalpy nesie kölemı 2,2 trln teŋgenı qūraityn şamamen 13 myŋ joba qoldau tapty. Osy şaralardyŋ arqasynda 14 myŋnan astam jaŋa jūmys orny qūrylyp, 143 myŋnan astam jūmys orny saqtaldy. Käsıporyndar 27,7 trln teŋgenıŋ önımın öndırıp, biudjetke şamamen 2 trln teŋge kölemınde salyq tüstı», – dedı «Damu» qory basqarma töraǧasy Farhat Särsekeev.
Körme sörelerınen azyq-tülık, jeŋıl jäne himiia önerkäsıbı, maşina jasau, jihaz ben qūrylys salasynyŋ tauarlaryn tabuǧa bolady. Biyl körme auqymyna qyzmet körsetu sektory qosyldy.
