قاسيەتتى مەكەن – «تالدى» تاريحي-ارحەولوگيالىق پاركىندە «سارىارقانىڭ كوشپەلى مادەنيەتى: ۇلى دالانىڭ قۇپيالارى – تالدى» اتتى حالىقارالىق سيمپوزيۋم وتۋدە. قاراعاندى وبلىسىندا ۇيىمداستىرىلعان عىلىمي فورۋمعا قازاقستان، تۇركيا، گەرمانيا، ۆەنگريا جانە رەسەي عالىمدارى قاتىسىپ، ارحەولوگيالىق مۇرانى ساقتاۋ ماسەلەلەرىن، زاماناۋي زەرتتەۋ ادىستەرىن جانە حالىقارالىق ىنتىماقتاستىقتىڭ كەلەشەگىن تالقىلاۋدا.
كونفەرەنتسيا وتەتىن ورىن رەتىندە «تالدى» پاركىنىڭ تاڭدالۋى كەزدەيسوق ەمەس. مۇندا وڭىردەگى ەڭ تانىمال ەسكەرتكىشتەردىڭ ءبىرى – قولا داۋىرىنە جاتاتىن بىرەگەي ارحەولوگيالىق نىسان قاراجارتاس پيراميداسى ورنالاسقان. عالىمدار «تالدى» كەشەنىن ۇلى دالانىڭ باي تاريحى مەن مادەني مۇراسىن ايعاقتايتىن ماڭىزدى ەسكەرتكىشتەردىڭ ءبىرى دەپ سانايدى.
سيمپوزيۋمنىڭ اشىلۋىندا قاراعاندى وبلىسى اكىمىنىڭ ورىنباسارى الىبەك الدەنەي قازىرگى زاماندا تاريحي ەسكەرتكىشتى ساقتاۋدىڭ ماڭىزدىلىعىنا توقتالدى.
— بۇگىندە جاساندى ينتەللەكت پەن جاڭا تەحنولوگيالار ءومىرىمىزدى قارقىندى تۇردە وزگەرتىپ جاتىر. الايدا ءبىزدىڭ كىم ەكەنىمىزدى جانە تامىرىمىزدىڭ قايدان باستاۋ الاتىنىن تۇسىنۋگە تەك تاريح كومەكتەسەدى. ءوز وتكەنىن ۇمىتپاعان حالىق ءوزىنىڭ بولمىسىن ساقتاپ قالادى. ەگەر مىسىر پيراميدالارى ءنىل اڭعارى وركەنيەتىنىڭ سيمۆولىنا اينالسا، سارىارقاداعى ساق قورعاندارى ۇلى دالا وركەنيەتىنىڭ اۋقىمى مەن تەرەڭدىگىن الەمگە تانىتتى، — دەدى ول.
فورۋم اياسىنداعى ماڭىزدى وقيعالاردىڭ ءبىرى حالىقارالىق ىنتىماقتاستىق تۋرالى كەلىسىمدەرگە قول قويۋ بولدى. قاراعاندى وبلىستىق تاريحي-ولكەتانۋ مۋزەيى ۆەنگريانىڭ ARC-heo art-REKO ستۋدياسىمەن جانە ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريح فاكۋلتەتىمەن مەموراندۋمدار جاساستى.
تاراپتار بىرلەسكەن زەرتتەۋلەر جۇرگىزۋگە، تاجىريبە الماسۋعا جانە تاريحي-مادەني مۇرانى ساقتاۋعا باعىتتالعان جوبالاردى جۇزەگە اسىرۋعا ۋاعدالاستى.
سيمپوزيۋم قوناقتارىنا قاراعاندى وبلىستىق تاريحي-ولكەتانۋ مۇراجايى،
شەت اۋداندىق ارحەولوگيالىق-ەتنوگرافيالىق مۇراجايى جانە نۇرا اۋداندىق تاريحي-ولكەتانۋ مۇراجايى ارنايى كورمەلەر ۇسىندى.
سونداي-اق وبلىستىڭ ءار اۋدانىنان كەلگەن قولونەرشىلەر ءوز بۇيىمدارىن كوپشىلىك نازارىنا شىعاردى.
عىلىمي باعدارلامانىڭ جارقىن بولىگىنە اينالعان ساداق اتۋدان وتكەن جارىستار قاتىسۋشىلارعا كوشپەلى مادەنيەتتىڭ داستۇرلەرىمەن جاقىنىراق تانىسۋعا مۇمكىندىك بەردى.
سيمپوزيۋم جۇمىسى ارحەولوگيا، انتروپولوگيا، پالەوبوتانيكا جانە ارحەومەتريا باعىتتارى بويىنشا تاقىرىپتىق سەكتسيالاردا جالعاستى.
عالىمدار كونە ارتەفاكتىلەردى زەرتتەۋدىڭ زاماناۋي ادىستەرىن، وتكەن داۋىرلەردە ءومىر سۇرگەن ادامداردىڭ كەلبەتىن قالپىنا كەلتىرۋ تاجىريبەسىن جانە ارحەولوگيالىق ولجالاردىڭ ماتەريالدارىن زەردەلەۋ تاسىلدەرىن تانىستىردى.
سونىمەن قاتار قاتىسۋشىلار ءۇشىن ارحەولوگيالىق زەرتتەۋلەردىڭ ەڭ جاڭا ادىستەمەلەرىنە ارنالعان حالىقارالىق سەمينار-ترەنينگ ۇيىمداستىرىلدى.
