Qasiettı meken – «Taldy» tarihi-arheologiialyq parkınde «Saryarqanyŋ köşpelı mädenietı: Ūly dalanyŋ qūpiialary – Taldy» atty halyqaralyq simpozium ötude. Qaraǧandy oblysynda ūiymdastyrylǧan ǧylymi forumǧa Qazaqstan, Türkiia, Germaniia, Vengriia jäne Resei ǧalymdary qatysyp, arheologiialyq mūrany saqtau mäselelerın, zamanaui zertteu ädısterın jäne halyqaralyq yntymaqtastyqtyŋ keleşegın talqylauda.
Konferensiia ötetın oryn retınde «Taldy» parkınıŋ taŋdaluy kezdeisoq emes. Mūnda öŋırdegı eŋ tanymal eskertkışterdıŋ bırı – qola däuırıne jatatyn bıregei arheologiialyq nysan Qarajartas piramidasy ornalasqan. Ǧalymdar «Taldy» keşenın Ūly dalanyŋ bai tarihy men mädeni mūrasyn aiǧaqtaityn maŋyzdy eskertkışterdıŋ bırı dep sanaidy.
Simpoziumnyŋ aşyluynda Qaraǧandy oblysy äkımınıŋ orynbasary Älıbek Äldenei qazırgı zamanda tarihi eskertkıştı saqtaudyŋ maŋyzdylyǧyna toqtaldy.
— Bügınde jasandy intellekt pen jaŋa tehnologiialar ömırımızdı qarqyndy türde özgertıp jatyr. Alaida bızdıŋ kım ekenımızdı jäne tamyrymyzdyŋ qaidan bastau alatynyn tüsınuge tek tarih kömektesedı. Öz ötkenın ūmytpaǧan halyq özınıŋ bolmysyn saqtap qalady. Eger Mysyr piramidalary Nıl aŋǧary örkenietınıŋ simvolyna ainalsa, Saryarqadaǧy saq qorǧandary Ūly dala örkenietınıŋ auqymy men tereŋdıgın älemge tanytty, — dedı ol.
Forum aiasyndaǧy maŋyzdy oqiǧalardyŋ bırı halyqaralyq yntymaqtastyq turaly kelısımderge qol qoiu boldy. Qaraǧandy oblystyq tarihi-ölketanu muzeiı Vengriianyŋ ARC-heo art-REKO studiiasymen jäne äl-Farabi atyndaǧy Qazaq ūlttyq universitetınıŋ Tarih fakultetımen memorandumdar jasasty.
Taraptar bırlesken zertteuler jürgızuge, täjıribe almasuǧa jäne tarihi-mädeni mūrany saqtauǧa baǧyttalǧan jobalardy jüzege asyruǧa uaǧdalasty.
Simpozium qonaqtaryna Qaraǧandy oblystyq tarihi-ölketanu mūrajaiy,
Şet audandyq arheologiialyq-etnografiialyq mūrajaiy jäne Nūra audandyq tarihi-ölketanu mūrajaiy arnaiy körmeler ūsyndy.
Sondai-aq oblystyŋ är audanynan kelgen qolönerşıler öz būiymdaryn köpşılık nazaryna şyǧardy.
Ǧylymi baǧdarlamanyŋ jarqyn bölıgıne ainalǧan sadaq atudan ötken jarystar qatysuşylarǧa köşpelı mädeniettıŋ dästürlerımen jaqynyraq tanysuǧa mümkındık berdı.
Simpozium jūmysy arheologiia, antropologiia, paleobotanika jäne arheometriia baǧyttary boiynşa taqyryptyq seksiialarda jalǧasty.
Ǧalymdar köne artefaktılerdı zertteudıŋ zamanaui ädısterın, ötken däuırlerde ömır sürgen adamdardyŋ kelbetın qalpyna keltıru täjıribesın jäne arheologiialyq oljalardyŋ materialdaryn zerdeleu täsılderın tanystyrdy.
Sonymen qatar qatysuşylar üşın arheologiialyq zertteulerdıŋ eŋ jaŋa ädıstemelerıne arnalǧan halyqaralyq seminar-trening ūiymdastyryldy.
