8 qaraşa künı Almaty oblysynyŋ ırı ärı tarihi öŋırı — Jambyl audanynyŋ Ūzynaǧaş auylynda «Auyl Äielı: Bırlık. Damu. Bolaşaq» atty aimaqtyq auyl äielderınıŋ forumy öttı. Is-şaraǧa 340-qa juyq belsendı auyl äielderı qatysty.
Forum Qazaqstan Respublikasy Prezidentınıŋ janyndaǧy Äielder ısterı jäne otbasylyq-demografiialyq saiasat jönındegı ūlttyq komissiianyŋ, «Auyl» partiiasynyŋ jäne Almaty oblysy äkımdıgınıŋ qoldauymen ūiymdastyryldy.
Basty maqsat — auyldyq jerlerdegı äielderdıŋ köşbasşylyq äleuetın arttyryp, olardyŋ ekonomikalyq mümkındıkterın keŋeitu. Būl bastama Memleket basşysy Qasym-Jomart Toqaevtyŋ auyldyŋ tūraqty damuyna baǧyttalǧan saiasatynyŋ aiasynda jüzege asyrylyp otyr.
Forumnyŋ aşylu saltanatynda Almaty oblysy äkımınıŋ orynbasary, öŋırlık komissiia töraǧasy Ǧani Mailybaev, Jambyl audanynyŋ äkımı Ertas Ertasūly, sondai-aq Prezident janyndaǧy ūlttyq komissiia müşesı Aigerım Sarsenbaeva jäne «Auyl» partiiasy töraǧasynyŋ orynbasary Ǧalymjan Qūsmanǧali söz söiledı.
Plenarlyq otyrys «Auyldyq jerlerdegı äielderdıŋ äleumettık-ekonomikalyq mümkındıkterın keŋeitu: öŋırlık damu saiasatynyŋ negızı» taqyrybyna arnaldy. Onda auyl käsıpkerlıgın damytu, qarjylyq jäne äleumettık qoldau tetıkterı, qūqyqtyq mümkındıkter men eksporttyq äleuet mäselelerı jan-jaqty talqylandy.
Almaty oblysynyŋ käsıpkerlık basqarmasy memlekettık granttar men jeŋıldetılgen nesie beru şarttaryn tanystyrsa, jūmyspen qamtudy üilestıru basqarmasy äielderge arnalǧan äleumettık baǧdarlamalardyŋ nätijelerı turaly baiandady. Auyl käsıpkerlerı öz täjıribelerımen bölısıp, auyl şaruaşylyǧyndaǧy kooperasiianyŋ maŋyzdylyǧyn atap öttı.
Forum aiasynda auyl äielderınıŋ qolynan şyqqan auyl şaruaşylyq önımderı men qolöner būiymdarynyŋ körmesı ūiymdastyrylyp, olardyŋ eŋbek äleuetı men ūlttyq dästürdı saqtaudaǧy ülesı körsetıldı.
Qorytyndysynda forumda köterılgen barlyq ūsynystar men özektı mäseleler Prezident janyndaǧy ūlttyq komissiianyŋ saraptamalyq jūmysyna engızılıp, ortalyq memlekettık organdarǧa zaŋnamalyq jäne äkımşılık deŋgeide qarau üşın joldanatyny aityldy.
