ماڭعىستاۋدا الەمگە ايگىلى اكتەر دجەكي چاننىڭ قاتىسۋىمەن تۇسىرىلەتىن «قۇدايدىڭ ساۋىتتارى 4: ۋلتيماتۋم» حالىقارالىق كينو جوباسىنىڭ ءتۇسىرىلىمى باستالدى، دەپ حابارلايدى «ادىرنا» ءتىلشىسى وبلىس اكىمدىگىنە سىلتەمە جاساپ.
جوبانى ءSاlem Entertainment جانە Dala Edge Creative Tech Park كومپانيالارى جۇزەگە اسىرۋدا.
قازىرگى تاڭدا ءتۇسىرىلىم توبى ماڭعىستاۋدىڭ بىرەگەي تابيعي لاندشافتتارىندا العاشقى كادرلاردى تاسپاعا تۇسىرۋدە. ءفيلمنىڭ نەگىزگى ءتۇسىرىلىم الاڭدارىنىڭ ءبىرى رەتىندە الەمگە تانىمال بوزجىرا شاتقالى تاڭدالعان. 7-12 ماۋسىم ارالىعىندا اتالعان اۋماقتا 35 ادامنان تۇراتىن ءتۇسىرىلىم توبى جۇمىس جۇرگىزىپ، ءفيلمنىڭ بىرقاتار كورىنىستەرىن تۇسىرگەن.
ماڭعىستاۋ وبلىسىنىڭ اكىمى نۇرداۋلەت قيلىباي شىعارماشىلىق توپ وكىلدەرىمەن كەزدەسىپ، حالىقارالىق اۋقىمداعى كينو جوبانى جۇزەگە اسىرۋعا جان-جاقتى قولداۋ ءبىلدىردى. كەزدەسۋ بارىسىندا وڭىردە كرەاتيۆتى يندۋستريانى دامىتۋ، كينو جانە تەلەۆيزيالىق جوبالاردى ءوندىرۋ، جاستارعا ارنالعان ساپالى مەدياكونتەنت قالىپتاستىرۋ، سونداي-اق ماڭعىستاۋدىڭ تۋريستىك جانە مادەني الەۋەتىن حالىقارالىق دەڭگەيدە ناسيحاتتاۋ ماسەلەلەرى تالقىلاندى.
«ماڭعىستاۋ – كينويندۋستريا سالاسىنداعى اۋقىمدى جوبالاردى جۇزەگە اسىرۋعا قولايلى ءوڭىر. ءبىز كرەاتيۆتى ەكونوميكانى دامىتۋعا، مادەني مۇرانى ناسيحاتتاۋعا جانە ءوڭىردىڭ تۋريستىك تارتىمدىلىعىن ارتتىرۋعا باعىتتالعان باستامالارعا جان-جاقتى قولداۋ كورسەتۋگە دايىنبىز. مۇنداي جوبالار ماڭعىستاۋدى حالىقارالىق دەڭگەيدە تانىتىپ، ءوڭىردىڭ الەۋەتىن كەڭىنەن كورسەتۋگە مۇمكىندىك بەرەدى»، – دەدى ول.
ءتۇسىرىلىم جۇمىستارى بيىل اياقتالادى دەپ جوسپارلانۋدا، ال ءفيلمنىڭ پروكاتقا شىعۋى 2027 جىلدىڭ اقپان ايىنا بەلگىلەنگەن.
